काठमाडौं । प्रतिनिधिसभा सदस्य दिलेन्द्रप्रसाद बडुले मेलम्ची खानेपानी आयोजनाका विषयमा देखिएको जटिलताप्रति सरकार संवेदनशील हुनुपर्ने बताएका छन्।
बुधबार बसेको प्रतिनिधिसभा बैठकमा सांसद बडुले आयोजनाको काममा खानेपानी मन्त्री बिना मगर र मन्त्रालयका पूर्वसचिव गजेन्द्रकुमार ठाकुरबीचको विवादका बारेमा प्रधानमन्त्रीले संसदमा जानकारी गराउनुपर्ने बताए।
आयोजनामा काम गरिरहेको इटालीको सीएमसी कम्पनीले पुस २ गतेबाट काम ठप्प पारेको थियो। क्षतिपूर्तिवापतको ३६ करोड रुपैयाँ नपाएको र आर्थिक रुपमा टाट पल्टिएपछि सीएमसीका प्रतिनिधि पुस ३ गते इटाली फर्किन लागेक थिए।
“इटाली फर्किन लागेका सीएमसीका प्रतिनिधिलाई प्रहरी लगाएर धरपकड गर्दा र पासपोर्ट जफत गर्ने, ठेकेदार थुन्ने कामले नेपालको छवी अन्तर्राष्ट्रिय क्षेत्रमा धमिलिएको छ,” सांसद बडुले संसदमा भने, “हामीले सुने अनुसार मन्त्री र सचिवबीच कमिसनको विवाद र ठेकेदारलाई बारम्बार दबाब दिएपछि ठेकेदार भागेको हामीले बुझेका छौं। मेलम्ची आयोजनाको वास्तविक कुरा के हो प्रधानमन्त्रीज्यूले संसदमा जानकारी दिनुपर्छ।”