काठमाडौं । नेपाल कम्युनिस्ट पार्टी (नेकपा)का स्थायी कमिटी सदस्य जनार्दन शर्मा ‘प्रभाकर’ले तत्कालीन नेकपा एमालेका रुकुम जिल्ला सचिव एवम् प्रतिनिधिसभा सदस्यका उमेदवार यदु गौतमको हत्या पार्टी निर्णय विपरीत भएको बताएका छन् ।

गौतमको २० औँ स्मृति दिवसका सन्दर्भमा राजधानीमा आज आयोजित कार्यक्रममा तत्कालीन माओवादीका युद्ध कमान्डरसमेत रहेका जनार्दनले स्वीकारे, “जनयुद्ध सामन्तवाद र राजतन्त्र विरुद्ध थियो । यदु गौतमहरूको विरुद्ध थिएन । तर, पनि अप्रिय घटना घट्यो ।” 

उनले यदु गौतमले जनयुद्ध र सशस्त्र संघर्षलाई सहयोग पुर्याउँदा–पुर्याउँदै पार्टीबाटै हत्या हुन पुगेको भन्दै दुःखसमेत व्यक्त गरे । “गौतमको हत्याबारे तथ्य सार्वजनिक भइसकेको छ,” शर्माले भने, “जनयुद्ध सकारात्मक हुँदाहुँदै पनि एकाध त्यस्तै नकारात्मक घटना घटेका छन् । नहुनुपर्ने घटना घटेका छन् ।”

‘सहिद यदु गौतम’ भन्दै कार्यक्रममा सम्बोधन शुरू गरेका प्रभाकरले थपे, “यदु गौतमको हत्याले कम्युनिस्ट आन्दोलनमा अपूरणीय क्षति पुगेको छ ।” मुलुक अहिले जनयुद्धकै उपलब्धिमा हिँडिरहेको दाबी गर्दै उनले युद्धको समीक्षा हुँदै आएको र हुँदै जाने बताए ।

शर्माले कम्युनिस्ट आन्दोलनको आवश्यकता अनुरूप हिजो सशस्त्र संघर्ष गरेर आएको माओवादी केन्द्र र शान्तिपूर्ण राजनीतिक धाराबाट आएका एमाले एक भए पनि एकता विस्तार हुन नसकेकोमा चिन्ता व्यक्त गरे । पार्टी एकतालाई टुंग्याएर समाजवादको आधार तयार गर्न ढिला गर्न नहुनेका उनको जोड थियो ।

“भ्रष्टाचारको अन्त्य र सुशासन कायम गर्दै हामी समाजवादको दिशामा अघि बढ्नुपर्छ । नेकपासँग त्यो सामथ्र्य छ । समाजवादको दिशामा अघि बढ्नुको विकल्प पनि छैन,” उनले भने । 
दिवंगत गौतमकी पत्नी एवम् प्रतिनिधिसभा सदस्य तीर्था गौतमले सहिदको सपना साकार पार्नुको विकल्प पार्टीसँग नरहेको बताइन् । समय परिवर्तित सन्दर्भमा अघि बढेकोकाले सहिद परिवार पनि सोही अनुरूप अघि बढेको उनको भनाइ थियो ।

सहिदको मर्म र भावनाअनुरूप पार्टी नचले र पार्टी र देशका लागि जीवन त्याग गर्ने नेता–कार्यकर्तालाई विर्सने हो भने सहिद परिवारसँग विद्रोहबाहेक अरू विकल्प नहुने उनको भनाइ थियो ।

गौतमले नेकपाको जीवनमा फागुन महिना अत्यन्तै दुखद् रहेको बताइन् । २०२९ साल फागन २१ गतेकै दिन सुखानीको जंगलमा पाँच जना नेताको हत्या भएको र २०५५ साल फागुन २१ गते नै आफ्ना पति मारिएको र केही दिनअघि पार्टीको उदीयमान नेता, मन्त्री रवीन्द्र अधिकारी तथा वृद्ध नेता भरतमोहन अधिकारी गुमाउनु परेकाले पनि नेकपाले फागुन बिर्सनु नहुनेमा उनको जोड थियो ।

२०५५ सालमा आजकै दिन एमालेका तर्फबाट प्रतिनिधिसभाका उमेदवार रहेका यदु गौतमकलाई तत्कालीन विद्रोही माओवादीले हत्या गरेको थियो । गौतम मारिएको दिनको सम्झनामा युदु स्मृति प्रतिष्ठानले २०५९ सालदेखि पत्रकारिता पुरस्कारसमेत प्रदान गर्दै आएको छ ।

यदु गौतम स्मृति पुरस्कारबाट यसवर्ष बाग्लुङका पत्रकार हरिनारायण गौतम सम्मानित भएका छन् ।