एजेन्सी । इंग्लिस प्रिमियर लिग फुटबलमा लिभरपुल शीर्ष स्थानमा उक्लने मौकाबाट बञ्चित भएको छ । आइतबार राति भएको खेलमा लिभरपुलले एभर्टनसँग गोलरहित बराबरी खेलेको थियो । एभर्टनको घरेलु मैदानमा भएको खेलमा बराबरी खेलेसँगै २८ वर्षपछि प्रिमियर लिगको उपाधि चुम्ने लक्ष्य सहित अगाडि बढेको लिभरपुललाई धक्का पुगेको छ ।
यतिमात्र होइन, लिभरपुलले बराबरी गरेसँगै लिग लिडर म्यान्चेस्टर सिटीलाई फाइदा पुगेको छ । लिगमा २९ औं चरणका खेल सकिँदा लिभरपुलले ७० अंक बनाएको छ । उता लिग लिडर सिटीले एक अंकको अग्रता लिएको छ । सिटीले ७१ अंक बनाउँदै शीर्ष स्थानमा आफूलाई स्थापित गरेको छ ।
निकै रोमाञ्चक खेलमा लिभरपुलले गोल गर्ने सुवर्ण अवसरहरु पाएपनि गोल भने गर्न सकेन । लिभरपुललाई बराबरीमा रोकेको एभर्टनले तालिकामा ३७ अंक जोडेको छ । आइतबार नै भएको प्रिमियर लिगको अर्काे खेलमा भने चेल्सी विजयी भएको छ । चेल्सीले फुलह्याममाथि २–१ गोलको जित निकालेको हो ।
फुलह्यामको घरेलु मैदानमा भएको खेलमा चेल्सीलाई जित दिलाउन गोन्जालो हिगुईन र जोर्गीन्होले एक–एक गोल गरे । जितसँगै चेल्सीले २८ खेलबाट ५६ अंक जोडेको छ । पराजित फुलह्याम १७ अंकसहित लिगमा पुच्छारबाट दोस्रो स्थानमा छ ।