तेहरान । इरानका विदेशमन्त्री मोहम्मद जाभद जरीफद्वारा सामाजिक सञ्जाल इन्स्ट्राग्राम मार्फत राजीनामाको घोषणा गरेका छन् । उनको राजीनामाको विषय इरानको सरकारी समाचार समिति इरनाले पनि पुष्टि गरेको छ । उनले आफ्नो कार्यकालमा भएको गल्तिप्रति माफी पनि मागेका छन् ।
जरिफले सन् २०१५ मा अमेरिकासँग भएको परमाणु संझौतामा महत्वपूर्ण भूमिका खेलेका थिए । तर, अमेरिकी राष्ट्रपति डोनाल्ड ट्रम्पले पछि सो सम्झौता रद्ध गर्ने घोषणा गरेका थिए ।
५९ वर्षिय जरिफ संयुक्त राष्ट्र संघका लागि इरानका राजदूत समेत रहिसकेका छन् । इरानमा सन् २०१३ मा हसन रुहानी राष्ट्रपतिमा निर्वाचित भएपछि उनी इरानको विदेशमन्त्री रहँदै आएका थिए । उनले आफ्नो कार्यकालमा सहयोग गरेको भन्दै इरानका जनता र प्रशासनलाई धन्यवाद दिएका छन् । तर, उनले किन राजीनामा दिए भन्ने कुरा चाहिँ खोलेका छैनन् ।
राष्ट्रपति रुहानीले उनको राजीनामा स्वीकृत गरे वा नगरेको बारेमा भने खुलाइएको छैन । अमेरिकाले परमाणु सम्बन्धी संझौता रद्ध गरेपछि उनी इरानका कट्टरपन्थीको निशानामा पर्दै आएका थिए । संझौताका कारण इरानले आफ्नो परमाणु कार्यक्रम सिमित गर्नुपरेको थियो । (बीबीसी)