विराटनगर । नेपाली काँग्रेसका केन्द्रीय सदस्य डा. शेखर कोइरालाले नेपाली काँग्रेस कोइरालाहरुले मात्र नबनाएको बरु प्रजातन्त्रलाई माया गर्ने धेरैको रगतले सिंचित भएको बताएका छन् ।
नेपाल प्रेस युनियन मोरङले सोमबार विराटनगरस्थित कोइराला निवासमा आयोजना गरेको पत्रकार सम्मेलनमा नेता कोइरालाले भने,‘‘सभापति शेरबहादुर देउवालाई थाहा हुनुपर्ने हो काँग्रेस कोइरालाहरुले मात्र बनाएको पार्टी होइन । यसमा धेरै साथीहरुले योगदान गर्नुभएको छ । धेरैको रगतले सिंचित भएर काँग्रेस बनेको हो ।’’
काँग्रेस शेरबहादुर देउवाले ‘पार्टी कोइरालाहरुको बपौती नभएको र शेखर कोइराला को हो ?’ भन्दै वीरगञ्जमा गरेको टिप्पणीबारे डा शेखरले, ‘‘म को हुँ भन्ने मलाई हेक्का छ, म मेरो राजनीतिक संस्कार छाड्न सक्तिन् बरु कोइराला परिवारको संस्कारलाई अझ बरकरार राख्छु,’’ भन्दै पार्टी सभापति देउवाको राजनीतिक संस्कार रहेछ भन्ने देखिएको टिप्पणी गरे । ‘‘उहाँले मेरो र परिवारबारे जे बोल्नु भएको छ, त्यो उहाँकै राजनीतिक संस्कार होला,’’ कोइरालाको भनाइ थियो । आफुले सभापतिको मानमर्दन नगरेको तर काँग्रेस कमजोर भएर जानुमा नेतृत्व नै असफल भएको भनि टिप्पणी गरेको बताए ।
बीपी कोइरालाले लेखेको विधान टेकेर यहाँसम्म आएको काँग्रेसले गिरिजाप्रसाद कोइरालाले संसद पुर्नस्थापना गराउँदा विश्वले वाहवाही गर्दासमेत पार्टीको विधान संशोधन गरिंदा राजनीतिक प्रस्तावनामा यसलाई नजअन्दाज गरिएको बताउँदै भने,‘‘सभापतिज्यूले बिर्सनु भएको छ तर विश्वले सम्झिरहेको छ तर यहाँ भने इतिहास मेटाउन खोजिएको छ ।’’ नेता कोइरालाले वहुमतले विधान पारित हुनु लोकतान्त्रिक विधि भएपनि आफू काठमाडौमा रहेको भए ‘नोट आफ डिसेन्ट’ लेख्ने बताए । तलबाट निर्वाचित भएर आउने प्रावधान नराखेकोमा आफूलाई मान्य नहुने बताउँदै कोइरालाले संरक्षित कोटामा पनि एक पटक मात्र हुनुपर्ने र अर्को पटकदेखि प्रतिस्पर्धाको आधारमा नै आउनु पर्ने व्यवस्थाको पक्षमा आफू रहेको बताए । महासमितिले दिएको ‘म्यान्डेड’ भन्दा अलग प्रस्ताव स्वीकार्य नहुने कोइरालाको जोड छ ।
१४ औं महाधिवेशनलाई समयमा हुन नदिन र समय थप गरेर अरु अढाई वर्ष लम्ब्याउने दाउमा सभापति देउवा लागेको तर पार्टी संगठनमा भएको जथाभावीको विषय लिएर आफूँ कार्यकर्तामाझ गईरहने बताउँदै कोइरालाले भने,‘‘काँग्रेस कमजोर भएको छ । संगठन शुन्य बराबर छ । हारको जिम्मा कसले लिने भन्दा मलाई अनुशासन र कार्वाहीको कुरा गरेर भने मलाई केही भन्नु छैन ।’’
डा. कोइरालाले सरकार क्रियाकलापहरु जनविरोधी देखिएको टिप्पणी गरे । भ्रष्टाचार झन् बढेको, मिडियालाई नियन्त्रण गर्न खोजिएको, वाइडबडी प्रकरणलाई सरकारले नै कमजोर बनाएको र नेपाली सेनालाई बद्नाम गर्न सरकार नै उद्धत रहेको टिप्पणी गरे । भने,‘‘वाइड बडीमा जो जो तानिएपछि कार्वाही हुनुपर्छ । अब अख्तियारले कसरी काम गर्छ भन्ने जनताको पर्खाइ छ ।’’ उनले एनसेल प्रकरणको पनि छानबिन गरी गलत गर्नेलाई कानुनी कठघरामा उभ्याइनु पर्ने बताए ।
पछिल्लो पटक विप्लव माओवादीको गतिविधिले देश पुनः द्वन्द्वकै चरणमा फर्काउने कोसिस सुरु गरिएको बताउँदै भने,‘‘उनीहरुसँग वार्ता पनि गर्नुपर्छ र अपराध गरे कानुनी कठघरामा पनि लैजानु पर्छ । दुबै विधिबाट सरकारले समस्या समाधानको बाटो खोज्नु पर्छ ।’’ कोइरालाले मानिसको ज्यान जाने गरी घटना गराउनु हिंसा भएको बताए ।