बीबीसी । पलुवामा हमलापछि भारत र पाकिस्तानबीचको दुस्मनीले अहिलेसम्मकै गम्भीर रुप लिएको छ । यस्तोमा आईसीसी विश्वकप २०१९ पनि संकटमा पर्नेबारे चिन्ता व्यक्त गरिएको छ ।

इंग्ल्यान्डमा हुन लागेको १० राष्ट्रबीच हुने यस प्रतियोगितामा भारत र पाकिस्तान एकअर्काको सामना गर्दैछन् । यस्तोमा पछिल्लो समय दुई देशबीच बढेको तनावले सो खेल निर्धारण गरिए अनुसार हुन कठिन हुने देखिएको बीबीसीले आफ्नो समाचारमा जनाएको छ ।
भारतको विशेष स्रोतअनुसार पाकिस्तानसँगको खेललाई भारतले बहिस्कार गर्नसक्ने छ ।

विशेषगरी भारतीय समर्थकले यस खेलको विरोध गरिरहेका छन् । भारतले आयोजकलाई समेत पाकिस्तानलाई टुर्नामेन्टबाट प्रतिबन्ध गर्न दबाब दिइरहेको बताइएको छ ।

डेढ महिना चल्ने आगामी विश्वकपका अन्य आठ सहभागी टिम पनि भारत–पाकिस्तानबीचको राजनीतिक विवादका कारण प्रभावित हुने डर रहेको छ । ती देशले पाकिस्तानलाई बहिस्कार गर्दै भारतको समर्थन गरे पाकिस्तानसँगको खेल सम्बन्ध जोखिममा पर्ने निश्चित छ ।
यसरी भारतीय क्रिकेटका अधिकारीहरुले पनि शुक्रबार बसेको एउटा बैठक सहभागी राष्ट्रहरुलाई आतंकवादको समर्थन गर्ने देशसँगको सम्बन्धमा कडाइ गर्न आग्रह गर्ने बताएको छ । यद्यपि १६ जुनको खेलबारे अहिले कुनै आधिकारिक निर्णय लिइएको छैन ।

भारतका प्रधानमन्त्री मोदीले समेत पाकिस्तानी हमलाको कडा जवाफ दिने चेतावनी दिएका छन् । भारतीय समर्थकहरु कप्तान विराट कोहलीलाई म्यान्चेस्टरमा हुने पाकिस्तानसँगको विश्वकप म्याच बहिस्कार गर्न आग्रह गरिरहेका छन् । यसहिसाबमा भारत–पाकिस्तानबीचको खेल सम्बन्ध राजनीतिक प्रभावकै कारण सधैं अशान्त रहँदै आएको र यसपटक पनि प्रभावित हुने देखिएको छ ।

तर, खेलको नियम अनुसार भारतले खेल बहिस्कार गरे पाकिस्तानले अङ्क प्राप्त गर्नेछ । यसकारण पनि यो विषय गम्भीरतापूर्वक हेरिएको छ किनकी भारत अंक गुमाउन चाहने छैन ।

यसरी क्रिकेटमा ‘रिफ्युज टु प्ले’ का आधारमा विपक्षीले अंक पाएको धेरै घटना छन् । २००३ को विश्वकपमा पनि इंग्ल्यान्डले खेलाडीहरुको सुरक्षाका कारण जिम्बावे यात्रा गर्न नसक्ने भएका कारण खेललाई हरारेबाट दक्षिण अफ्रिकामा स्थानान्तरण गर्न अपील गरेको इतिहास छ । तर, आयोजकबाट अनुमति नपाएपछि इङ्ल्यान्डले चार अंक गुमाउनु परेको थियो । 

यता भारतले अहिलेसम्म पाकिस्तानसँग विश्वकप खेल कहिल्यै हारेको छैन । निश्चित रुपमा भारतले यो म्याच गुमाउन पनि चाहँदैन । त्यसैले पनि खेलमा राजनीतिको प्रभाव फेरि कस्तो पर्ला भन्नेबारे धेरै महत्वका साथ हेरिएको छ ।

यसअघि सन् १९९९ मा पनि दुई देशबीचको दुस्मनी चरम बिन्दुमा पुगेको थियो । सो म्याचमा एकदमै कम रन प्रहार भएको थियो । खेलमा भारत ४७ रनले विजयी भएको थियो । तर, सो दिन कारगिलमा भएको भिडन्तमा ६ पाकिस्तानी सैनिक र ३ भारतीय अधिकारी मारिएका थिए ।

२००८ को मुम्बइ आतङ्की हमलाको घटनादेखि नै यी दुई देशले कुनैपनि क्रिकेट श्रृंखला खेलेका छैनन् । विश्वकप दौरानमा एकदविसीय र टी–ट्वान्टीमा भेट हुने गरेपनि दुईदेशबीच टेस्ट खेल नभएको ९ वर्ष भइसकेको छ ।

यसरी विगतमा पनि राजनीतिक विवादकै कारण यी दुई देशले लामो समयसम्म एकअर्का विरुद्धको खेल खेलेका थिएनन् । दुई देशबीचको सम्बन्धमा बढ्दो दुरीका कारण इन्डियन प्रिमियर लिग (आईपीएल) मा पाकिस्तानी खेलाडी सहभागी हुने गरेका छैनन् । 

दुवै देशका समर्थक पनि उत्तीकै उग्र छन् । भारतले पाकिस्तानलाई क्रिकेट श्रृंखलाका लागि आमन्त्रण गर्दा चरमपन्थी दक्षिणवादी समुहले नयाँ दिल्लीको फोरोजसा कोटलाको पिच खनिदिएका थिए । त्यसैगरी, कराँचीमा भएको एउटा खेलमा समर्थकले रंगशालामै आगजनी गरेका थिए । अहमदवादमा भएको एउटा खेलमा पाकिस्तानी टिमका सबै खेलाडीले हेल्मेट लगाएर खेलेका थिए ।

यसकारण पनि पहिलेदेखि नै भारत र पाकिस्तानबीचको खेलले राष्ट्रवाद र अराजकवादको रुप लिने गरेको छ ।

यस किसिमका आक्रामक घटनाहरु समयसँगै कम हुँदै गएपनि अहिले फेरि हिंसा दोहोरिन सक्ने सम्भावना बढेको छ । यसरी म्यान्चेस्टरमा हुने यो खेल प्रतिष्ठा, सम्बन्ध र आर्थिक हिसाबले अत्यन्तै महत्वपूर्ण मानिएको छ । विश्वकपजस्तो ठूलो प्रतियोगिताकै सर्वाधिक प्रतिक्षित खेल रद्द हुनुले विश्वकपलाई धेरै ठूलो क्षति पुर्याउने छ । सो खेलका लागि हालसम्म पाँच लाख समर्थकले टिकटको आवेदन दिइसकेका छन् ।

प्रतियोगिताका निर्देशक स्टिभ एल्वर्थीका अनुसार विश्वकपमा हुने भारत र पाकिस्ताको म्याच खेलकुद इतिहासकै सबैभन्दा ठूलो समारोह साबित हुनेछ । यसबारेमा भारतीय सांसद तथा लेखक शशि थारुरले भनेका छन्, “खेल रद्द हुनु भारतको दुई अंक गुम्नुमात्र होइन, प्रतिस्पर्धाबीनाको पराजय हो । किनकी यो आत्मसमर्पण भन्दा पनि भयानक साबित हुने पक्का छ ।”
बीबीसीबाट