धनगढी । धनगढी प्रिमियर लिग (डीपीएल) ३ को उपाधिका लागि शनिबार सिवाईसी अत्तरिया र महेन्द्रनगर युनाइटेडबीच प्रतिस्पर्धा हुँदैछ । काठमाडौं गोल्डेन्सले शुक्रबार दोस्रो क्वालिफायर्स बहिष्कार गरेपछि महेन्द्रनगरले स्वतः फाइनलमा प्रवेश पाएको थियो । आफ्ना खेलाडी अंकित दवासलाई बलिङमा प्रतिबन्ध लगाएको भन्दै काठमाडौंले अन्तिम समयमा आएर खेल बहिष्कार गरेको थियो । पहिलो क्वालिफायर्समा काठमाडौंलाई ४१ रनले हराएर अत्तरिया फाइनल पुगेको थियो ।
महेन्द्रनगरले भने रुपन्देही च्यालेन्जर्सलाई बिहीबार १ रनको झिनो अन्तरले हराउँदै क्वालिफायर्समा स्थान बनाएको थियो । फाइनल खेल्न पाउनु राम्रो भएपनि जुन तरिकाले उपाधि होड पुग्दा मजा नआएको महेन्द्रनगरका कप्तान शरद भेषावकरले बताएका छन् ।
फाइनलको अघिल्लो दिन पत्रकार सम्मेलनमा बोल्दै अत्तरियाका कप्तान दिपेन्द्रसिंह ऐरीले डीपीएलमा टोलीले राम्रो प्रदर्शन गरिरहेको र फाइनलमा पनि बिना दबाब खेल्ने बताए । उनले भने, “यसपटक जसरी हामी खेलिरहेका छौं । यसका आधारमा जित्छौं भन्नेमा आशावादी छौं ।”
शरदले हरेक टोलीको लक्ष्य उपाधि जित्ने भएजस्तै आफ्नो पनि त्यहि रहेको बताए । उनले कुनै एक खेलाडीमा भन्दा पनि टोलीका सबैको सामूहिक प्रदर्शनमा उपाधि जित्ने विश्वास व्यक्त गरे । अत्तरियाले राम्रो खेलि रहेको छ । कुनै पनि टोलीले उपाधि जित्नु छ भने च्याम्पियन टोलीलाई हराउनै पर्छ, शरदले भने, राम्रो क्रिकेट खेल्नुपर्छ,दुबै टोलीलाई फाइनलमा दबाव हुन्छ । सहि समयमा सहि क्रिकेट खेल्न सक्यौं भने उपाधि जित्ने छौं ।