विराटनगर । मानिसको ‘मति बिग्रिपछि कसैको केही लाग्दैन’ भन्ने बूढापाकाको भनाइलाई चरितार्थ गर्दै चिनजानकै गाउँले युवाको हत्या गर्ने एकजना अभियुक्त १० वर्षपछि प्रहरीको फन्दामा परेका छन् । हत्यापछि भारत भास्सिएका उनलाई नेपाल प्रहरीले काँकरभिट्टाबाट पक्राउ गरेर मुद्दा चलाउन मोरङ ल्याएको छ ।
प्रहरीका अनुसार झापा साविक गरामनी गाविस वार्ड नम्बर २ हाल बिर्तामोड नगरपालिकाका ४ बस्ने ४३ वर्षीय शरण भट्टराई पोखरमा अध्यापन पेशा गर्दथे । श्रीमती र एक छोरा थिए । २०६० सालदेखि पोखरकाको आलुमाईला माले चोकमा डेरा गरी अन्नपूर्ण उच्च मावि र कसमस इन्टरनेश्नल कलेज पोखरामा अध्यापन पेशा गराउँदै आएका उनको ‘मति बिग्रियो’ । पैसाको लोभले आफ्नै गाउँका युवकको हत्या गरेर ६५ हजार रुपैयाँ बोकी श्रीमती र छोरो च्यापेर भारत भास्सिए ।
घटना २०६५ सालको हो । बिदामा चैत २९ गते उनी पोखराबाट नाईट बसमा भोलिपल्ट झापा आइपुगे । घर आएको केही समयपछि प्यान्क्रियाजको समस्या भयो । उपचार गर्न पारि भारतको पानीट्याङ्की गए । निद्रा लाग्नेसहित अन्य औषधि किनेर फर्किए । २०६५ चैत ३१ गते बिहान बिर्तामोड आए ।
गाउँकै युवा बिर्तामोड ४ का दिपक पाण्डेलाई मोबाइलमा फोन गरे । ९ः३० बजे बिर्तामोडबाट इटहरीतर्फ हिँडे । तर, पथरी बजार आइनपुग्दै उनको मन बदलियो । शरण भट्टराईले झोलाबाट निद्रा लाग्ने औषधि मिसाएको कोकाकला झिकी आफूले पिएजस्तो नाटक गरे । अनि दिपकलाई पनि खुवाए । कानेपोखरी आइपुग्दा दिपक रिगंटा लाग्यो भनि सवारी चलाउन नसक्ने अवस्थामा पुगे । त्यसपछि आफै सवारी चलाए ।
गाडीलाई भाउन्ने जंगल नजिकैको चौरतर्फ लगे । पानी छर्कदा दिपक बोलेनन् । बिर्तामोडबाट हिँडेको दुई घन्टामै गाडीभित्र रहेको दाउले मृतकको घाँटीमा दुई पटक प्रहार गरे । दिपकको इहलिला त्यहीँ समाप्त भयो । हत्याको उद्देश्य मृतकले चलाएको को १ च ३८५० नम्बरको मारुती कार लुटी बिक्री गरी पैसा कमाउने मात्र रहेको अनुसन्धानबाट खुलेको मोरङ प्रहरीले जनाएको छ । एसपी मनोज केसीले भने, ‘‘कार लुट्ने र पैसा कमाउने उद्देश्य नै देखिन्छ ।’’
हत्यापछि कार आफैले चलाएर शरण पोखरातर्फ लागे । दिपकको हत्याले परिवारमा रुवासासी चल्यो । नयाँ वर्षकै अघिल्लो दिन भाइ गुमाउनु पर्दा दाजु रेवत पाण्डे र उनको परिवारमाथि बज्रपात हुन पुग्यो । प्रहरीमा जाहेरी दिए । तर, शरण फेला परेनन् । उनीहरु न्याय पाउने आसमा दिनमात्र कुरेर बसेका थिए ।
नेपाल प्रहरीको टोलीले निगरानी गरिरहेकै अवस्थामा गत फागुन ७ गते शरण झापाको काँकडभित्ताबाट पक्राउ परे । उनलाई मोरङ जिल्ला अदालतबाट कर्तव्य ज्यान मुद्दामा म्याद थप गरी प्रहरी हिरासतमा राखी थप अनुसन्धान शुरु गरिएको छ । जिल्ला प्रहरी कार्यालय मोरङका एसपी मनोज केसीले शुक्रबार फरार अभियुक्तलाई सार्वजनिक गर्न आयोजित पत्रकार सम्मेलनमा भने, ‘‘अपराध लुक्दैन । अपराधी फेला पर्छन् । पीडितले न्याय पाउँछन् । यो घटनाबाट यही पुष्टि भएको छ ।’’