काठमाडौं । उपत्यकामा हर्न बजाएर यात्रा गर्दै हुनुहुन्छ ? हो भने कारवाहीमा परिएला ! पछिल्लो समय हर्न बजाउने सवारी साधनविरुद्ध महानगरीय ट्राफिक महाशाखाले कारवाही प्रक्रिया तीव्र पारेको छ । महाशाखा र काठमाडौं प्रशासनले ०७४ वैशाख १ गतेबाट काठमाडौं उपत्यकाभित्र हर्न पूर्ण रुपले निषेध गर्न वातावरण विभागलाई सिफारिस गरेको थियो ।
ध्वनीको गुणस्तर सम्बन्धी राष्ट्रिय मापदण्ड २०६९ विपरित ध्वनी प्रदूषण गर्ने सवारी साधनहरुलाई कारवाही गर्ने कानुनी व्यवस्था रहेको महाशाखाका एसएसपी वसन्तकुमार पन्तले बताए । ध्वनी प्रदूषण गर्ने सवारीमाथी ५०० रुपैयाँसम्मसम्म जरिवाना गर्न सकिने कानुनी प्रावधान छ । ट्राफिक महाशाखाका अनुसार चालु आर्थिक वर्षमा मात्रै ५४०० सवारी साधनमाथी कारवाही गरेको छ ।
बिहीबार मात्रै महाशाखाले उपत्यकाका विभिन्न स्थानमा हर्न बजाउने २१३ सवारी साधनमाथी कारवाही गरेको छ । यस्तै आर्थिक वर्ष ०७३–०७४ मा ९६६३ सवारी साधनमाथी कारवाही भएको थियो भने ०७४–०७५ मा १५४०५ सवारी साधनमाथी कारवाही गरिएको महाशाखाले जनाएको छ । महाशाखाले ध्वनी नियन्त्रण गर्न उपत्यकाभित्र गुड्ने तथा उपत्यकाबाट बाहिरिने र भित्रिने सवारी साधनहरुमाथि निगरानी राख्दै आएको एसएसपी पन्तले बताए । ‘‘हामीले हर्नविरुद्धको कारवाही तिव्र पारेका छौं । मोड तथा घुम्तीहरुमा बाहेक हर्न बजाउन निषेध छ,’’ एसएसपी पन्तले भने ।