काठमाडौं । प्रधानमन्त्री केपी शर्मा ओलीले विहीबार दहचोकमा आयोजित कालु पाण्डेको समाधिस्थलमा आफ्नी धर्मपत्नी राधिका शाक्यलाई गुराँसको फूल प्रदान गर्दा त्यहाँको वातावरण रमाइलो भयो । बिहीबार शुरु भएको त्स्रो इन्द्र दह पर्यटन महोत्सवमा प्रधानमन्त्रीले धर्मपत्नी राधिका शाक्यलाई गुराँसको फूल दिएका हुन् । सर्वसाधारणले दिएको गुराँसको फूल प्रधानमन्त्रीले पत्निलाई दिँदा त्यहाँ रहेका बालबालिकाहरु मुस्कुराएका थिए ।
सो अवसरमा बोल्दै प्रधानमन्त्री ओलीले काजी कालु पाण्डेको समाधी स्थल नेपालीको लागि तिर्थस्थल भएको बताएका थिए । उनले त्यहाँ आयोजित पर्यटन महोत्सवको उद्घाटन गरेका थिए ।
प्रधामन्त्री ओलीले पाण्डेको पूर्णकदको सालिक अनावरण समेत गरेका थिए । हरेक बर्ष प्रधानमन्त्री ओलीले सो ठाउँमा गएर कालु पाण्डेप्रति श्रद्धान्जली ब्यक्त गर्ने गरेको प्रधानमन्त्रीको निजी सचिवालयले जनाएको छ । चन्द्रागीरी नगरपालिका १ का रहेको सो ठाउँमा प्रधानमन्त्री ओलीले गतबर्ष पाँचतले भ्यू टावर शिलान्यास गरेका थिए । टावरको दुई तला निर्माण भइसकेको छ । यसैगरी प्रधानमन्त्री ओलीले गतबर्ष नै कंलकी – दहचोक सडकको स्तरोन्नती हुने घोषणा गरेकोमा यस बर्ष काम धमाधम काम भइरहेको बताइएको छ । यसैगरी यहाँ मनकामाना मन्दिरको पुनर्निमार्ण भइसकेको छ भने इन्द्र दहको पुनर्निमार्णको काम भइरहेको प्रधानमन्त्रीको सचिवालयले जनाएको छ ।
प्रधानमन्त्री ओलीले दहचोकलाई पर्यटकीय क्षेत्रको रुपमा विकास गर्नुपर्ने विहीबारको कार्यक्रममा बताएका थिए । नेपाल एकिकरणका एकजना सारथी पाण्डेले ४४ बर्षको उमेरमा नेपाल एकिकरणका लागि जीवन आहुती दिएर असाधारण योगदान गरेको प्रधानमन्त्री ओलीले सो अवसरमा बताए ।
“हाम्रा पूर्खाहरुले ज्यान दिएर देश बचाए हामीले ज्यान दिनु पर्दैन अडानमा बसे मात्र पुग्छ” प्रधानमन्त्री ओलीले सो अवसरमा भनेका थिए, “राष्ट्रको पहिचान र राष्ट्रको रक्षाका निम्ति त्यो एकिकरण भएको थियो । यसलाई जोगाउन हामीमा एकता चाहिन्छ ।”