ललितपुर । विवेकशील साझा पार्टीले मधेशका विषयहरुमाथि विभिन्न वक्ताहरुद्वारा छलफल कार्यक्रमको आयोजान गरेको छ । बिहिबार ललितपुरस्थित पार्टीको कार्यालयमा आयोजित ‘मधेश मन्थन– १’ नामक कार्यक्रममा मधेशका विषयमा विभिन्न वक्ताहरुले आफ्ना धारणा राखे ।
सो अवसरमा संविधान र मधेशका विषयमा कृष्ण हाथेछुले आफ्नो धारणा राख्दै मधेशका बासिन्दाहरुलाई भारतीय मूलका भन्नुको साटो मधेशी मूलका नेपाली र पहाडी मूलका नेपाली भनिएको भए आज यस किसिमको दूरी नरहने विचार व्यक्त गरे ।
मधेशको राजनीतिका विभिन्न आयामहरुका विषयमा अर्का वक्ता तुलानारायण साहले मधेशले गरेको राजनीति राज्यलाई करेक्सन गर्नका लागि भएको बताए ।
अर्का वक्ता लेखक तथा साहित्यकार खगेन्द्र संग्रौलाले मधेशको राजनीतिमा विराट रिक्तता रहेकोले त्यो रिक्तता घटाउन लाग्नु पर्ने भनाइ राखे । कार्यक्रममा मधेशमा पहिचानको प्रश्न विषयमाथि डा.विजय मिश्रले बोलेका थिए भने पत्रकार वसन्त बस्नेत र सीएन थारुले पनि मधेशका विभिन्न विषय माथि आफ्ना विचार राखे ।
विवेकशील साझा पार्टीका केशव दाहालद्वारा सहजीकरण गरिएको मधेश मन्थनको दोस्रो चरणमा विवेकशील साझा पार्टीका संयोजक रविन्द्र मिश्रलगायतले बोलेका थिए ।