काठमाडौं । तल्ला कमिटी एकता गर्न गठित नेपाल कम्युनिस्ट पार्टी (नेकपा) को ९ सदस्यीय कार्यदलले अन्तिम प्रतिवेदन तयार गर्न एक साताको समय मागेको छ । विभिन्न कारणले काम गर्न नसकिएको भन्दै कार्यदलले सचिवालयसँग एक साताको समय मागेको हो । 

नेकपा सचिवालयको आजको बैठकमा कार्यदलका संयोजक तथा सदस्यहरुलाई छलफलका लागि बोलाइएको थियो । बैठकमा कार्यदलले एक साताको समय मागेको र एक सातामा सुझाव र सिफारिससहित अन्तिम प्रतिवेदन तयार गर्ने प्रतिबद्धता व्यक्त गरेको कार्यदलका सदस्य योगेश भट्टराईले जानकारी दिए । बिहान बसेको कार्यदल र सचिवालयको संयुक्त बैठकमा कुरा राखेर कार्यदलका सदस्यहरु निस्किएका थिए ।

सचिवालय बैठक कुनै निर्णय नगरी सकिएको छ । कार्यदलको कुरा सुनिएको र थप समय दिने वा बाँकी काम सचिवालयले नै गर्ने भन्ने निर्णय भोलिको सचिवालय बैठकले गर्ने पार्टी प्रवक्ता नारायणकाजी श्रेष्ठले जानकारी दिए । बैठक भोलि बिहान ९ बजे बस्नेछ । 

तल्ला कमिटी एकता गर्न नेकपाले गत पुस १२ गते ९ सदस्यीय कार्यदल बनाएको थियो । सचिवालय सदस्य रामबहादुर थापाको संयोजकत्वमा गठित कार्यदललाइ १५ दिनको समयसीमा तोकेर संगठनात्मक एकताको प्रस्ताव तयार पार्ने कार्यादेश दिइएको थियो । कार्यदलमा रामबहादुर थापा, विष्णु पौडेल, सुरेन्द्र पाण्डे, शंकर पोखरेल, वर्षमान पुन, योगेश भट्टराई, बेदुराम भुषाल, लेखराज भट्ट, रघुवीर महासेठ सदस्य छन् ।

विधान परिमार्जन, प्रदेश कमिटी पुनर्गठन, पोलिट्ब्युरो गठनको प्रस्ताव, केन्द्रीय सदस्यहरूको कार्यविभाजन गर्ने कार्यादेश कार्यदलले पाएको थियो ।