काठमाडौं । प्रतिनिधि सभामा प्रतिपक्षी दलका सांसद अमरेशकुमार सिंहले ‘लुट कान्छा लुट’ गीतका सर्जक पशुपति शर्मालाई फागुन महिनाको आफ्नो तलबबाट २५ हजार रुपैयाँ दिने बताएपछि गायक प्रमोद खरेलले त्यसको प्रतिवाद गरेका छन् । खरेलले गीतमाथि राजनीति नगर्न आग्रह गरेका छन् ।
आफ्नो फेसबुक एकाउन्टमा उनले पशुपति शर्मालाई २५ हजार रुपैयाँ दिने घोषणा गर्ने सांसद सिंहलाई उक्त रकम आफ्नो क्षेत्रका विकास निर्माणमा खर्चिन सुझाव दिएका छन् ।
उनले फेरि पनि यस्ता गीत बनाउन र गाउने अवास्था सिर्जना नगर्न पनि आग्रह गरेका छन् ।
दुई दिन अगाडि बसेको प्रतिनिधि सभाको बैठकमा सांसद सिंहले सरकारले गीत गाउनसमेत प्रतिबन्ध लगाउन खोजेको सुनिएको भन्दै अभिव्यक्ती स्वतन्त्रताको हनन् गर्न खोजेको आरोप लगाएका थिए । अहिलेको यथार्थलाई बाहिर ल्याएको भन्दै सांसद् सिंहले गायक शर्मालाई फागुन महिनाको आफ्नो तलबबाट २५ हजार रुपैयाँ दिने बताएका थिए ।