काठमाडौं । घुस लिएको आरोप लागेपछि राजीनामा दिएका अख्तियार दुरुपयोग अनुसन्धान आयोगका पूर्व आयुक्त राजनारायण पाठकको बारेमा छानबिन गर्न अख्तियारले तीन सदस्यीय छानबिन समिति बनाएको छ । 
अख्तियारका प्रवक्ता रामेश्वर दंगालले बाह्रखरीलाई जानकारी दिएअनुसार समितिले आजबाट काम थालिसकेको छ । छानबिन समितिमा को को छन् भन्ने कुरा भने सार्वजनिक गर्न नमिल्ने उनले बताए । 
पाठकमाथि ७८ लाख रुपैयाँ घुस लिएको आरोप लागेपछि उनले यही फागुन ३ गते राष्ट्रपति विद्यादेवी भण्डारी समक्ष राजीनामा दिएका थिए । कसरी कारवाही प्रक्रिया पूरा गर्ने भन्ने बारेमा अख्तियारले महान्यायाधिवक्ताको कार्यालयसँग राय मागेकोमा सोमबार महान्यायाधिवक्ताको कार्यालयले अख्तियारले नै कारवाही प्रक्रिया अघि बढाउन सक्ने राय दिएको बताइएको छ । 
भक्तपुरस्थित नेपाल इन्जिनिरिङ कलेजको स्वामित्व विवाद विषयमा लम्बोदर न्यौपाने समूहबाट ७८ लाख रुपैयाँ घुस लिएको उनीमाथि आरोप लागेको थियो ।