काठमाडौं । घुस लिएको आरोप लागेपछि अख्तियार दुरुपयोग अनुसन्धान आयोगबाट राजीनामा दिएका तत्कालीन आयुक्त राजनारायण पाठकविरुद्ध अख्तियारले आजैबाट थप कदम चाल्ने भएको छ । ‘‘आजबाट केही होला । हामी परामर्शका क्रममा छौं । बाहिरबाट हेर्दा केही नभएजस्तो देखिएपनि आयोगले काम गरिरहेको छ,’’ अख्तियारका प्रवक्ता रामेश्वर दंगालले बाह्रखरीसँगको कुराकानीमा मंगलबार भने ।
उनले बाहिर यतिका कुरा आएकोले अब कसैले उजुरी गरिरहनुपर्ने अवस्थासमेत नरहेको जानकारी गराए । पाठकमाथि ७८ लाख रुपैयाँ घुस लिएको आरोप लागेपछि उनले यही फागुन ३ गते राष्ट्रपति विद्यादेवी भण्डारी समक्ष राजीनामा दिएका थिए । कसरी कारवाही प्रक्रिया पूरा गर्ने भन्ने बारेमा अख्तियारले महान्यायाधिवक्ताको कार्यालयसँग राय मागेकोमा सोमबार महान्यायाधिवक्ताको कार्यालयले अख्तियारले नै कारवाही प्रक्रिया अघि बढाउन सक्ने राय दिएको बताइएएको छ ।
राजीनामा दिएर कोही पनि पदाधिकारी दोषबाट मुक्त हुन नसक्ने भन्दै पाठकमाथि कारवाहीको माग भइरहेको छ । संविधानको धारा २३९ र भ्रष्टाचार निवारण ऐन २०५९ अनुसार पाठकविरूद्ध कानुनी कारवाही अघि बढ्न सक्ने महान्यायाधिवक्ताको कार्यालयले राय दिएको आयोग स्रोतले बताएको छ ।
भक्तपुरस्थित नेपाल इन्जिनिरिङ कलेजको स्वामित्व विवाद विषयमा लम्बोदर न्यौपाने समूहबाट ७८ लाख रुपैयाँ घुस लिएको उनीमाथि आरोप लागेको थियो । घुस दिने र लिने दुवैलाई कारवाही गर्नुपर्ने सर्वत्र माग गरिँदै आएको छ । कारवाही प्रक्रिया ढिलो भइरहेको भन्ने आरोप लागेको सन्दर्भमा अख्तियार प्रवक्ता दंगालले बाह्रखरीसँग भने, ‘‘त्यस्तो होइन, काम भइरहेको छ । चाँडै थप प्रक्रिया अघि बढ्छ ।’’
प्रतिनिधिसभाको सोमबारको बैठकमा पनि पाठकको भ्रष्टाचार काण्डले प्रवेश पाएको थियो । भ्रष्टाचारमा मुछिएका आयुक्त पाठकले पदबाट राजीनामा गरेका सम्बन्धमा सत्यतथ्य पत्ता लगाउन माग गरेका थिए सांसदहरुले । उनीहरुले संवैधानिक पदमा रहेर भ्रष्टाचार गर्ने व्यक्तिले पदबाट राजीनामा दिँदैमा छुट पाउन नहुनेमा पनि जोड दिएका थिए ।