काठमाडौं । नेपाल कम्युनिस्ट पार्टी (नेकपा)ले संगठनात्मक एकता टुंगो लगाउन गठित ९ सदस्यीय कार्यदल तत्काल विघटन नगर्ने भएको छ । एकताको बाँकी काम टुंग्याउन पुस दोस्रो हप्ता सकिएको स्थायी कमिटीले रामबहादुर थापा ‘बादल’को संयोजकत्वमा कार्यदल गठन गरेको थियो । 

विधान परिमार्जन, प्रदेश कमिटी हेरफेर, केन्द्रीय सदस्यहरूको कार्यविभाजन, पोलिट्ब्युरो गठन, केन्द्रीय निकाय र विभागलाई पूर्णता दिन गठित ‘शक्तिशाली कार्यदल’ले दुई महिना व्यतीत गरेर अपूर्ण प्रतिवेदन बुझाएको थियो ।

तर, कार्यदल विघटन गर्दा स्थायी कमिटीको म्यान्डेड अवमूल्यमन हुने ठहर गर्दै कार्यदललाई यथावत् राख्ने र उनीहरूसँग पनि छलफल गरेर एकताको बाँकी काम टुंग्याउने सचिवालयले निष्कर्ष निकालेको हो ।

“कार्यदलले सचिवालयलाई बुझाएको प्रतिवेदन पूर्ण छैन । पूरा काम नगरी कार्यदल विघटन गर्दा एकीकरण झन् अन्यौलमा पर्न सक्छ,” सोमबारको सचिवालयको बैठकपछि झलनाथ खनालले बाह्रखरीसँग सङ्क्षिप्त कुराकानी गर्दै भने, “कार्यदलका सदस्यसमेत बसेर एकता टुंग्याउने तयारी सचिवालयको छ ।”

सचिवालयको अर्को बैठक आगामी ९ गते ९ बजे बस्नेछ । बैठकमा कार्यदलका सदस्यसमेतलाई बोलाइने प्रवक्ता नारायणकाजी श्रेष्ठले जानकारी दिए ।

स्रोतका अनुसार कार्यदलले स्वतःस्फूर्त काम गर्न नसकेपछि अध्यक्षद्वय केपी शर्मा ओली, पुष्पकमल दाहाल ‘प्रचण्ड’, कार्यदलका संयोजक रामबहादुर थापा र महासचिव विष्णु पौडेल बसेर प्रदेश १ र २ का जिल्ला इन्चार्ज, सहइन्चार्ज, अध्यक्ष र सचिवको सूची तयार पार्ने काम भित्रिरूपमा गरिरहेका थिए । 

कार्यदललाई छलेर अध्यक्षद्वय, संयोजक र महासचिवमात्रैले कार्यविभाजन प्रस्ताव तयार पर्दा असन्तुष्टि झाँगिने भयले कार्यदललाई विघटन नगरिएको स्रोतको दाबी छ ।
चौथो वरीयताका नेता खनालले पनि कार्यदलाई तत्काल विघटन गर्न नहुने र काम गर्न दिइनुपर्ने राय राखे ।

नेकपा एमाले र माओवादी केन्द्रबीच पार्टी एकता भएर नयाँ पार्टी नेकपा निर्माण भएको ९ महिना पूरा भए पनि एकीकरण प्रदेश तहसम्म एकता विस्तार हुन सकेको छ ।