काठमाडौं । लोकगायक पशुपति शर्माले राष्ट्रपति र प्रधानमन्त्रीलाई जनताको तहबाट सचेत गराउन पाइन्छ कि भनेर मात्रै आफूले गीत गाएको बताएका छन् । उनले देश लुट्न कसैले पनि पाउँदैन भनेर आफूले यस्तो गीत गाएको बताएका छन् । नेपाली रेडियो नेटवर्कको नेपाली बहस कार्यक्रममा पत्रकार ऋषि धमलासँग कुरा गर्दै उनले यस्तो बताएका हुन् ।
उनले युवासंघका कार्यकर्ताको फोन आएपछि आफूले युट्युबबाट गीत हटाएको बताएका छन् ।
कुराकानीका क्रममा उनले भनेका छन्, “केही कुरा हटाउँदा कसैको मन छ्याङ्ग हुन्छ भने हटाएर फेरि युट्युबमा राख्छु । यो मेरो सिर्जना मात्रै हो । धेरैबाट जनसमर्थन छ । म कार्यक्रममा हिँड्दा, बुबाआमासँग भेट्दा, हाम्रो देशका गरिब जनता जसले सरकारबाट आशा गरेका छन् । त्यो अनुरुप नभइरहँदा उहाँहरुले भनेका कुरालाई मैले जस्ताको त्यस्तै राखेको हुँ । ”
उनले पुस्तौँपुस्तादेखि नेपालमा लुट मच्चिएको बताउँदै लुट्न हुँदैन भन्ने आफ्नो व्यङ्ग्य मात्रै भएको बताएका छन् । “मैले लुट्न पाइन्छ पनि भनेको छैन । यो गीतको सुरुमै भनेको छु । पञ्चायत सुनेँ, बहुदल र गणतन्त्र भोगेँ तर देश र जनताको निस्वार्थ सेवा गर्ने कुनै नेता भेटेँ न अरु कोही भनेको छु । मैले नेतालाई मात्रै होइन । अरु कोही पनि भनेको छु । जो सुकै होस् देश लुट्न पाइँदैन ।”
उनले आफुले राष्ट्रपति र प्रधानमन्त्रीलाई पनि प्रहार नगरेको बताए ।
“मैले प्रधानमन्त्रीलाई कुनै प्रहार गरेको छैन । मेरो एउटा टुक्का छ । यमराजको शासन भनेको छु । मैले अहिले यमराजको शासन भनेको होइन । हजुरबुबाको पालादेखि अहिलेसम्म आउँदा पनि स्वर्गजस्तो नेपालमा इन्द्रको शासन भएन भनेको छु । अहिलेमात्रै भनेको होइन । स्वर्गको देशमा इन्द्रको शासन किन हुन सकेन भन्ने गीतमार्फत भनेको हुँ । गणतन्त्र आइसकेपछि राष्ट्रपति पनि हामी सबैको अभिभावक हो । अभिभावक र बच्चाको सम्बन्ध पनि त्यस्तै हुनुपर्छ । गल्ती भएको रहेछ भने गल्ती भयो भन्न सक्नुपर्छ ।”
उनले जनताले सचेत गराउन पाइएला कि भनेर गीतमार्फत भनेको बताउँदै कुनै पाप नगरेको बताएका छन् ।
“गीतमा भएका भन्दा कडा कुरा संसदमा गरेको सुनेको छु,” उनले भनेका छन्, “गीत बाहिर आएपछि फोन आयो । युवासंघ नेपालका साथीहरुले फोन गर्नुभएको थियो । यमराजको शासन भन्ने कुरामा नेकपाको झण्डा आयो भनेर आपत्ति जनाउनुभयो । कार्यकर्ता कुकुरजस्तै भुक्छन् भन्नेमा आपत्ति रहेछ । राष्ट्रपतिलाई किन आक्षेप लगाएको भन्नुभयो । आत्मसम्मानमा चोट पुग्छ भने किन राख्नु भनेर हटाएको हुँ । तर भाव सबैको मनमा रहेछ ।”
उनले कांग्रेस सरकारमा हुँदा अमेरिका यहीँ, जापान पनि यहीँ भन्ने गीत गाउनु संयोग मात्रै भएको बताए ।
“कांग्रेस सरकारमा भएका बेला जापान पनि यहीँ अमेरिका यहीँ भनेर गीत गाउनु संयोग मात्रै हो,” उनले भनेका छन्, “कुनै चुनाबी सभामा गीत गाएको छैन । चुनावताका देश र जनताले जित्नुपर्छ भनेर सिर्जना गरेको थिएँ । विवाद आएपछि मैले युट्युबबाट हटाएको हुँ । एकदुईवटा शब्द फेरेर पठाउने तयारी गरेको छु ।”
“अहिले यो गीत मेरो च्यानलमा छैन । युवासँघका कार्यकर्ताको फोन आएपछि गीत हटाएको हुँ । केही शब्द परिमार्जन गरेर यमराजको फुटेज, राष्ट्रपतिको शब्दमा केही हेरफेर गरेर युट्युबमा राख्नेछु । जनतामाझ बताइदिनुस् भैरहेको के हो ? भनेर पनि राख्न सक्छु ।”
तस्बिर फेसबुकबाट