काठमाडौं । व्यावसायिक शिक्षा तथा तालिम परिषद् (सीटीईभीटी) ले यस वर्ष १ सय १ वटा स्थानीय तहमा नयाँ प्राविधिक शिक्षालय स्थापना गरेको छ । सीटीईभीटीले दिएको जानकारीअनुसार सबै स्थानीय तहमा प्राविधिक शिक्षाको पहँुच विस्तार गर्ने सरकारको प्रतिवद्धताअनुसार यसअघि २ सय ११ वटा सामुदायिक विद्यालयहरुमा प्राविधिक शिक्षा कार्यक्रम विस्तार गरिसकिएको छ ।
यस वर्ष १ सय १ वटा स्थानीय तहका सामुदायिक विद्यालयहरुमा प्राविधिक शिक्षा थप गरी हालसम्म ४ सय ५७ बढी प्राविधिक शिक्षा तथा व्यावसायिक शिक्षा तालिमको व्यवस्था गरिएको शिक्षा, विज्ञान तथा प्राविधि मन्त्रालयले जनाएको छ ।
सरकार संचालनको एक वर्ष पुगेको सन्दर्भमा प्रधानमन्त्री केपी शर्मा ओलीले समेत दुई वर्षभित्र सबै स्थानीय तहमा प्राविधिक शिक्षा पुर्याउने घोषणा गरेको बताउँदै सीटीइभीटीले यो वर्ष मात्र १ सय १ स्थानीय तहमा नयाँ प्राविधिक शिक्षालय स्थापना गरेको घोषणा गरेका थिए । उनले घोषणामा यति धेरै स्थानीय तहमा प्राविधिक शिक्षालय स्थापना भएको यो इतिहासमै पहिलो उल्लेखसमेत गरेका छन् ।
सीटीईभीटी सूचना तथा अनुसन्धान महाशाखाका निर्देशक विनय मिश्रले प्राविधिक शिक्षा विद्यालय कार्यक्रम अन्तर्गत ७ सय ५३ वटै स्थानीय तहका प्राविधिक शिक्षाको विस्तार कार्यक्रम क्रमबद्धरुपमा अगाडि बढिरहेको जानकारी दिए ।
सीटीईभीटीले प्राविधिक शिक्षाका विद्यार्थीहरुमध्ये ७० प्रतिशतले जागिर तथा स्वरोजगार भएको दाबी गरेको छ । मिश्रले हाल कक्षा ९ देखि नै प्राविधिक शिक्षा कोर्समा समावेश गरिएको बताउँदै उच्च शिक्षा आर्जन गर्न चाहनेहरुका लागि समेत सीटीईभीटीले विभिन्न कोर्षहरु संचालन गरेको जानकारी दिए ।
प्राविधिक शिक्षालाई ७० प्रतिशत बढाउने सरकारको योजना रहेको शिक्षा मन्त्रालय उच्च तथा प्राविधिक शिक्षा महाशाखाले जनाएको छ । सीटीईभीटी अन्तर्गत हाल ४० वटा कार्यक्रम संचालनमा छन् ।
सीटीईभीटीका आफ्नै ३४ वटा र निजी क्षेत्रका ५ सय बढी शैक्षिक संस्थाहरुमार्फत् हाल प्राविधिक शिक्षा प्रदान गर्दै आएको जनाएको छ ।