आतंक कहिल्यै उचित र स्वीकार्य हुँदैन । यसैले दुनियाँको कुनै पनि भागमा मानवताविरुद्ध मच्चाइएको आतंकको निन्दा गर्नै पर्छ । भारतको कस्मिरको पुलवामामा बिहीबार सेन्ट्रल रिजर्व पुलिस फोर्स (सीआरपीएफ) का जवान चडेको गाडीमा आत्मघाती बम विस्फोट गराएर ४४ जना सुरक्षाकर्मीको हत्या गरिएको छ । यस आतंककारी हमलाको जिम्मेवारी पाकिस्तानमा क्रियाशील जैस ए महम्मद नामको संगठनले लिएको बताइएको छ । भारतले त यसै पनि पाकिस्तानले कास्मिरी पृथकतावादीलाई सहयोग गरेको र भारतमा आतंक फैलाउनेहरूलाई संरक्षण गरेको आरोप लगाउँदै आएको छ । नेपालको परराष्ट्र मन्त्रालयले भारतमा भएको आतंककारी घटनाको निन्दा गरिसकेको छ । प्रधानमन्त्री केपी ओलीले पनि भारतीय समकक्षीलाई समवेदना दिएका छन् । यो पाकिस्तानविरुद्ध भारतको पक्ष लिएको भने होइन । भारत र पाकिस्तानको विवादमा तटस्थ रहेर पनि आतंकको निन्दा गर्न सकिन्छ ।

आतंकको पीडा नेपालीले पनि एक दशकभन्दा बढी भोगेका छन् । यसैले आतंककारी घटनाप्रति नेपाली समाज बढी संवेदनशील हुन्छ । संसारको कुनै पनि कुनामा आतंककारी घटना हुँदा दोरम्बा, बाँदरमुढे, खारा, कोटवाडा, काजोल खातुन, मैना सुनुवार, मुक्ति अधिकारी, कृष्ण सेन आदि कैयौं घटना र नाम सम्झनामा आउँछन् । अनि, नेपालमा आतंककारी घटना गराउनेहरू भारत भूमिमा सुरक्षित आश्रयमा बसेको पनि बिर्सन सकिँदैन । अहिले पनि नेपाल आतंक मुक्त भइसक्यो भन्न सकिने अवस्था छैन । बेलाबखत सशस्त्र विद्रोहको धम्की दिने संगठनहरू क्रियाशील नै छन् । यसै पनि नेपालीहरू उम्कनै नसक्ने चन्दाको आतंकको धरापमा त छँदैछन् । भारतमाथि भएको आतंककारी हमलाको निन्दा गर्नेमा नेपाल अग्र पंक्तिमा हुनुको कारण यही हो ।

हुनत, पाकिस्तानको सरकारले नै आतंककारीलाई संरक्षण गरेको प्रमाणित हुनसकेको छैन तर, त्यहाँको राज्य संयन्त्रमा धार्मिक कट्टरपन्थीको प्रभाव भने स्पष्टै देखिन्छ । यसैले भारतका प्रधानमन्त्री नरेन्द्र मोदीले पाकिस्तानलाई ‘कडा जबाफ’ दिने धम्की दिएका होलान् । भारतभर घटनाको चर्को विरोध भएको छ र पाकिस्तानविरुद्ध आक्रोश प्रकट भइरहेको छ । पाकिस्तानलाई पाठ सिकाउन सरकारलाई उक्साृने काम भइरहेको छ । यसले भारत–पाकिस्तानबीच मुठभेडको जोखिम बढाएको छ । यसैले नेपालले आतंकको निन्दा गर्दागर्दै पनि भारत र पाकिस्तानबीच वार्ता र विश्वासको वातावरण बनाउन प्रयास गर्नु उचित हुनेछ । सार्कको अध्यक्ष र सचिवालय भएको मुलुकका नाताले पनि मध्यस्थता गर्ने नेपालको कर्तव्य नै हो । भारतसँगका हाम्रा गुनासा र असन्तुष्टि आफ्ना ठाउँमा छन् तर आतंकविरुद्ध हामी भारतको साथमा उभिनुपर्छ ।