काठमाडौं । सेयर बजार सुस्ताउने क्रम अझै रोकिएको छैन । सेयर बजारमा यस साताभर २७ अंकको गिरावट आएको छ । 
बजारमा कारोबार रकममा समान्य सुधार हुँदा परिसूचक घट्नुले बजार अपेक्षाकृत रुपमा अगाडि बढ्न नसकेको संकेत गरेको छ । पछिल्लो समय लगानीकर्ता प्यानको कुराले अल्झिनुका साथै ब्याजदरले सताइएका छन् । 
यही कारण पनि सेयर बजार अझै पनि सुस्त छ । विभिन्न तहका नीतिगत सुधार र अनलाइाको पूर्ण कार्यान्वयनले पनि लगानीकर्ता दिगो रुपमा खुसी हुन नसकेको देखिन्छ । हाल बजार बढ्न नसक्नुको कारण सेयर बजारमा थपिँदो नयाँ सेयर रहेको पनि मानिएको छ । बजारमा सेयरको संख्यामात्र बढिरहँदा बजारमा लगानीकर्ताको संख्या बढेको छैन ।
लगानीकर्तामा अझै अन्योल रहँदा यस साताभर धितोपत्र बजारमा नेप्से परिसूचक २६.७ अंकले घटेको छ । साताभर एकदिनमात्र (दोस्रो दिन) सामान्य अंकले बढेको नेप्से परिसूचक समग्रमा ओरालो लागेको हो ।
सुरुको दिनमै १२ अंकले घटेको सेयर बजार दोस्रो दिन समान्य बढ्न खोजेपनि त्यो प्रयास विफल रह्यो । त्यसयता लगातार घटेको बजारले समग्र दिशा सकारात्मक देखाउन सकेको छैन । नेप्सेमा ठूलो गिरावट आएको अवस्थामा बजारमा यससाताको कुल कारोबार रकम भने बढेको छ । कारोबार रकम अघिल्लो साताभन्दा दोब्बर हुँदै ३ अर्ब ३ करोड ७४ लाख रुपैयाँमा कायम भएको हो ।
यसक्रममा सेयर बजारमा १ सय ८८ कम्पनीका २५ हजार ४ सय ९१ कारोबार भए । कारोबार संख्या घटेपनि यससाता कारोबारमा आएका सेयरको संख्या दोब्बरले बढेको हो । साताभर १ करोड १२ लाख २४ हजार कित्ता सेयर कारेबारमा आए ।
अघिल्लो साता बजारमा १ अर्ब ५० करोड रुपैयाँ बराबरको सेयर बिनबेच भएका थिए । नेप्सेको उताररचढाव कायम रहँदा बजारको औसत कारोबार ६० करोड कायम भएको हो ।
नेप्से अघिल्लो साताभर ३० अंकले घटेको थियो । नेपाल स्टक एक्स्चेन्जका अनुसार पहिलो दिनको सुरुवाती बिन्दुभन्दा नेप्से २.३४ प्रतिशत (२६.७ अंक)ले घटेर १ हजार १ सय १२ दशमलव ८७ अंकमा पुगेको छ ।
नेप्से बढ्दा यससाता ‘क’ वर्गका कम्पनीहरुको कारोबार मापन गर्ने सेन्सेटिभ परिसूचक पहिलो दिनको तुलनामा २.३५ प्रतिशतले घटेर २३६.९१ अंकमा आइपुगेको छ ।
नेप्से घट्दा यससाता लगानीकर्ताले ३२ अर्ब रुपैयाँ गुमाएका छन् । साताभर लगानीकर्ताको कुल सम्पत्ति २.३१८ प्रतिशतले घटेको हो । अघिल्लो साताको अन्तिम दिन १३ खर्ब ९० अर्ब ६३ करोड रुपैयाँ रहेको बजार पुँजीकरण साताको अन्तिम दिन १३ खर्ब ५८ अर्ब ४४३ करोड रुपैयाँमा कायम भएको छ ।
यससाता कारोबार रकमका आधारमा माथिल्लो तामाकोशी जलविद्युत् कम्पनीलाई उछिन्दै एभरेस्ट बैंकको संस्थापक अग्रस्थानमा रह्यो । बैंकका साताभर १९ करोड १७ लाख रुपैयाँका ४२ हजार कित्ता सेयर किनबेच भए ।
यससाता नेप्सेमा एनसीसी बैंकका ७९ लाख ११ हजार कित्ता हकप्रद तथा जानकी फाइनान्सका ८ लाख ८७ हजार कित्ता, निर्धन लघुवित्तका २० लाख कित्ता, वैस्टर्नविकास बैंकका ७ लाख ४७ हजार र मुक्तिनाथ विकास बैंकका ४७ लाख २९ हजार कित्ता बोनस सेयर नेप्सेमा सूचीकृत भए ।