काठमाडौं । नेपाली राष्ट्रिय महिला फुटबल टोलीका प्रशिक्षक हरी खडकाले भारतलाई उसैको मैदानमा पराजित गर्ने सपना पूरा भएको बताएका छन् । उनले अबको लक्ष्य महिला साफ च्याम्पियनसिपको उपाधि भएको बताएका छन् ।
राष्ट्रिय टोलीका पूर्वकप्तानसमेत रहेका प्रशिक्षक खड्काले भारतलाई खेलाडी हुदाँदेखि पराजित गर्ने सपना पूरा नभए पनि प्रशिक्षकका रुपमा पूरा भएको बताएका छन् । “एउटा सपना थियो । खेल्दादेखिनै भारतलाई भारतकै भूमिमा हराउने । खेल्दा त पूरा गर्न सकिनँ,” राष्ट्रिय महिला टोलीको प्रशिक्षक खड्काले फेसबुकमा लेखेका छन्, “प्रशिक्षकको जिम्मेवारी पाएपछि पनि त्यो सपनालाइ साथै डो¥याएर हिँडे । आज त्यो सपनालाई हाम्रा साहसी चेलिहरुले पूरा गरिदिए ।”
सोमबार भारतको उडिसास्थित कलिंगा रंगशालामा भएको हिरो वुमेन्स गोल्डकपमा नेपालले भारतलाई २–१ ले पराजित गरेको थियो । नेपालको जितमा दुबै गोल सावित्राले गरेका थिए । नेपालको सिनियर महिला टोलीले भारतलाई अहिलेसम्म पराजित गर्न सकेको थिएन ।
नेपालले अब समूह लिग चरणको अन्तिम खेलमा इरानविरुद्ध बुधबार खेल्नेछ । इरानले यसअघिका दुबै खेलमा पराजित भएको छ । लिगमा नेपाल दोस्रो स्थानमा छ । पहिलो स्थानमा म्यानमार छ । लिग चरणको शीर्ष दुई टोलीले फाइनल खेल्नेछ ।
प्रशिक्षक खड्काले खेलाडीप्रति आभार प्रकट गर्दै प्रशिक्षकको जिम्मेवारी दिएको एन्फालाई धन्यबाद दिएका छन् । उनले फागुन २८ गतेबाट नेपालको विराटगनरमा हुने हुने महिला साफ च्याम्पियनसिपको उपाधि जित्ने अबको गन्तब्य भएको बताएका छन् ।
“चेलीहरुलाई हृदयदेखि आभार प्रकट गर्न चाहन्छु,” प्रशिक्षक खड्काले थपे, “अब हाम्रो गन्तव्य भनेको साफ च्याम्पियनसिप हो । यसको लागि सबैलाई मनोबल उच्च राखी तयार हुन पनि आग्रह गर्दछु । मेरो सहकर्मी मित्रहरुलाइ धन्यवाद ।”
साफमा नेपाल समूह ‘ए’ मा छ । समूहमा ‘ए’ नेपालसहित बंगलादेश, भुटान र पाकिस्तान छ । समूह ‘बी’ मा सविक विजेता भारत, माल्दिभ्स र श्रीलंका छन् । समूह चरणको शीर्ष दुई टोलीले सेमिफाइनलमा प्रतिस्पर्धा गर्नेछ । महिला साफ च्याम्पियनसिपमा नेपाल पहिलो तीन संस्करणमा उपविजेता भएको थियो भने गत संस्करणमा सेमिफाइनलबाटै बाहिरिएको थियो । यसअघिको चारै संस्करणमा भारत विजेता भएको थियो ।