नेपालको राजनीतिमा सबै सफल क्रान्ति र आन्दोलनको नेतृत्व गरेको नेपाली कांग्रेस नेतृत्वकै कमजोरीका कारण क्षयोन्मुख भएको छ । प्रतिदिन कांग्रेस झन् झन् ओरालो लागिरहेको देखिएको छ । नेतृत्व अक्षममात्र भए पनि संगठन ओरालो लाग्छ । त्यसमाथि, नेतृत्व नै निहित व्यक्तिगत स्वार्थमा धोका दिन तम्सेपछि संगठनलाई जोगाउनै मुस्किल हुन्छ । अहिले नेपाली कांग्रेस सायद यस्तै विशृंखल अवस्थामा पुगेको छ । नत्र, महासमितिले विधान संशोधनका क्रममा निर्णय गरेका प्रावधान हटाउन केन्द्रीय समिति नलाग्नु पर्ने हो । महासमितिले केन्द्रीय कार्यसमिति बैठकबाट परिमार्जनसहित जारी गर्ने गरी विधान संशोधन पारित गरेको थियो । तर, महासमितिको बैठक सकिएको डेढ महिनाबित्दा समेत केन्द्रीय समितिले विधान पारित गर्न सकेको छैन ।
विवाद हुनु र त्यसमा छलफल हुनु पनि धेरै ठूलो विषय हैन । कांग्रेसजस्तो धेरै नेता र कार्यकर्ता भएको देशको पुरानो ठूलो पार्टीमा सबैजसो विषयमा मतभेद हुनसक्छ । त्यस्तो विवाद लोकतान्त्रिक प्रक्रियाद्वारा समाधान पनि हुन्छ । असहमति हुँदाहुँदै पनि लोकतान्त्रिक प्रक्रियाबाट भएको निर्णय सबैलाई मान्य हुन्छ । कांग्रेसमा केन्द्रीय पदाधिकारी र सदस्यहरू स्वतः महाधिवेशन र क्षेत्रीय प्रतिनिधि मानिने प्रावधान विधानमा राख्ने वा नराख्ने विषयमा अहिले विवाद चर्किएको छ । महासमितिले केन्द्रीय नेताहरू पनि सुरुदेखि नै पार्टी संगठनमा निर्वाचित भएर आउनुपर्ने प्रस्ताव पारित गरेको थियो । पार्टी सभापतिलगायतले विधानमा यो प्रावधान समावेश गर्ने वचन दिएपछि विधान संशोधन प्रस्ताव केन्द्रीय समितिबाट सम्पादन र परिमार्जन गर्नेगरी पारित भएको थियो । अहिले महासमितिले पारित गरेको प्रावधानको मर्मविपरीतको व्यवस्था विधानमा राख्नु महासमितिलाई धोका दिनु हो ।
नेपाली कांग्रेसका नेताहरूले जनतामा आफ्नो छवि कति बिग्रिसक्यो भनेर समीक्षा कहिल्यै गरेका छैनन् । त्यसो त चुनावमा इतिहासकै सबैभन्दा कमजोर अवस्था भएपछि पनि कांग्रेस नेतृत्व यथार्थपरक समीक्षा गरेर पाठ सिक्ने र सुध्रने प्रयासमा लागेन । बरु, एकअर्कामाथि दोषारोपण र दन्तबझानमै उनीहरू रमाएको देखियो । महासमितिको बैठक बोलाउनसमेत पार्टी नेतृत्व सहजरूपमा तयार भएन । अहिले महासमितिको निर्णय नै उल्ट्याएर धोका दिने प्रपञ्च रच्दैछ । आफैँसमेतले गरेको निर्णय चुनावमा हारिने भयले उल्ट्याउने हो भने नेपाली कांग्रेसले आफूलाई लोकतान्त्रिक पार्टी दाबी गर्न पनि सुहाउँदैन । महासमितिलाई धोका दिँदा पार्टीभित्र पनि राम्रो सन्देश जाँदैन । जनस्तरमा त यसै पनि कांग्रेस अहिले प्रतिरक्षात्मक अवस्थामै छ । यसैले महासमितिको बैठकको निर्णय उल्ट्याएर दुनियाँ सामु धोकेवाज देखिने नेतृत्वको प्रपञ्च पार्टीका लागि प्रत्युत्पादक हुने देखिन्छ । पार्टीको सबैभन्दा महत्त्वपूर्ण निकायलाई समेत धोका दिनेहरूलाई अरू कार्यकर्ता र जनताले कसरी विश्वास गर्लान् र ?