काठमाडौं । भारतको उडिसामा जारी हिरो वुमेन्स गोल्डकपमा नेपालले आयोजक भारतविरुद्ध २ गोलको अग्रता लिएको छ । पाँचौं महिला साफ च्याम्पीयनसिपलाई केन्द्रित गरी हिरो वुमेन्स गोल्डकपमा सहभागि नेपालले सावित्रा भण्डारीको गोलमार्फत् दुई गोलको अग्रता बनाएको हो ।
खेलको पाँचौ मिनेटमा पहिलो गोल गरेकी सावित्राले लगत्तै दुई मिनेटपछि अर्को गोल गरेकी छन् । पहिलो खेलमा म्यानमारसँग पराजय भोगेको नेपाल भारतविरुद्धको खेलमा विशेष रणनीतिसहित मैदान उत्रिएको छ । साफअघि एकअर्काको कमजोरी पत्ता लगाउने र टोलीको कमजोर पक्ष सुधार गर्ने दुवै टोलीको रणनीति छ । पछिल्लो समय नेपाल र भारतबीच कात्तिकमा म्यानमारमा ओलम्पिक छनोटमा प्रतिस्पर्धा भएको थियो । जहाँ नेपालले भारतलाई १–१ को बराबरीमा रोकेको थियो । उडिसास्थित कालिंगा रंगशालामा खेल भइरहेको छ ।
साफ च्याम्पीयनसिप र ओलम्पिक छनोटलाई केन्द्रित गर्दै भारतले आयोजना गरेको चार राष्ट्र सम्मिलित हिरो वुमेन्स गोल्डकपमा आयोजक भारतसहित नेपाल, म्यानमार र इरान सहभागी छन् ।