काठमाडौं । नेपाली कांग्रेसका सभापति शेरबहादुर देउवाले भ्रातृ संगठन नेपाल विद्यार्थी संघ (नेविसंघ) का अध्यक्ष नैनसिंह महरको राजीनामा स्वीकृत गरेका छन् । सोमबार बसेको केन्द्रीय कार्यसमिति बैठकमा सभापति देउवाले अध्यक्ष महरको राजीनामा स्वीकृत गरेका हुन् ।
उनले महरलाई नेविसंघमा रहँदा गरेको कामप्रति धन्यवादसमेत दिएका छन् । महरले सोमबार दिउँसो नै सभापति देउवालाई राजीनामा बुझाएका थिए । पार्टी नेताहरुबाट आएको ‘प्रेसर’ थेग्न नसकेपछि अध्यक्ष महरले राजीनामा दिएका हुन् ।
नेविसंघकै विषयमा पार्टीभित्र नेताहरुका बीचमा ‘द्वन्द्व’ देखिएपछि उनले राजीनामा गरेर मार्गप्रशस्त गरेका श्रोतको भनाइ छ । उनले राजीनामा दिनु अगाडि नेविसंघ केन्द्रीय कार्यसमितिमा रहेका विद्यार्थी नेताहरुसँग छलफल गरेका थिए ।
नेविसंघको विधान संशोधन गरेर थपिएको पाँच महिनाको समय माघ २ गते पूरा भैसकेको थियो । तर पार्टीले माघ १० गते बस्ने केन्द्रीय कार्यसमितिले गर्ने निर्णय बमोजिम हुने गरी नेविसंघको केन्द्रीय कार्यसमितिलाई यथावत् राखेको थियो ।
यसैबीच केन्द्रीय कार्यसमितिको अर्को मंगलबार दिउँसो २ बजेका लागि बोलाइएको छ ।