काठमाडौं । अख्तियार दुरुपयोग अनुसन्धान आयोगले ललितपुरस्थित भूमिसुधार तथा मालपोत कार्यालयका नायव सुब्बा कुमारबहादुर राजभण्डारी र बिचौलिया बाबुराजा शाक्य विरुद्ध विशेष अदालत काठमाडौंमा भ्रष्टाचार गरेको आरोपमा मुद्दा दायर गरेको छ । अख्तियारले उनीहरुसँग बिगो ६ हजार रुपैयाँ दाबी गर्दै आइतबार मुद्दा दायर गरेको हो ।
“नायव सुब्बा कुमारबहादुर राजभण्डारीले भ्रष्टाचार निवारण ऐन, २०४९ को दफा ३ को उपदफा १ को कसुर गरेको र लेखापढी व्यवसायी बाबुराजा शाक्यले भ्रष्टाचार निवारण ऐन, २०५९ को दफा ३ को उपदफा २ बमोजिम कसुर गरेको सप्रमाण पुष्टि हुन आएकोले,” अख्तियारद्वारा आइतबार जारी विज्ञप्तिमा उल्लेख छ, “निजहरुलाई बिगो ६ हजार कायम गरी भ्रष्टाचार निवारण ऐन, २०५९ को दफा ३ को उपदफा १ र दफा ३ को उपदफा १ को देहाय ‘क’ बमोजिम जरिवाना र कैद सजाय हुन मागदाबी लिई विशेष अदालत काठमाडौंमा आरोपपत्र दायर गरिएको छ ।”
राजभण्डारी र शाक्यले जग्गा हालसाविक गर्ने प्रयोजनको लागि बिभिन्न बहाना बनाई सेवाग्राहीसँग घुस रकम मागेको उजुरी परेपछि अख्तियारले उनीहरुमाथि अनुसन्धान थालेको थियो । अख्तियारको मुख्यालय टंगालबाट खएिको टोलीले केही दिन अघि उनीहरुलाई सेवाग्राहीसँग ६ हजार रुपैयाँ घुस लिइसकेको अवस्थामा पक्राउ गरेको थियो । त्यसपछि थप अनुसन्धान गरी अख्तियारले आइतबार उनीहरु विरुद्ध विशेष अदालतमा मुद्दा दायर गरेको हो ।
