रोयल्टी संकलन समाजका नव निर्वाचित अध्यक्ष खड्कासँग के छन् नयाँ योजना ?

रोयल्टी संकलन समाजका नव निर्वाचित अध्यक्ष खड्कासँग के छन् नयाँ योजना ?

काठमाडौं । संगीत रोयल्टी संकलन समाजका नव निर्वाचित अध्यक्ष महेश खड्काले रोयल्टी संकलन र वितरणलाई प्रभावकारी बनाउँदै लैजाने बताएका छन् । रोयल्टी संकलनका सम्भावित नयाँ क्षेत्रलाई पहिचान गर्दै रोयल्टी संकलनको दायरा फराकिलो बनाउने उनले बताए । 

“पुरानो कार्यसमितिले अगाडि बढाएका काम अगाडि बढाएर त्यसलाई थप प्रभावकारी बनाउनु नयाँ कार्यसमितिको दायित्व हो,” नव निर्वाचित अध्यक्ष खड्काले बाह्रखरीसँग भने, “रोयल्टी उठाउनु र त्यसलाई वैज्ञानिक मापदण्ड बनाएर वितरण गर्नु मेरो पहिलो दायित्व हुनेछ ।”

उनले यातायातबाट उठेको रोयल्टीलाई कसरी वैज्ञानिक मापदण्ड बनाएर वितरण गर्ने भन्नेबारे नयाँ कार्यसमितिको काँधमा आएको बताए । ०७४ साल चैत २१ गतेबाट रोयल्टी संकलन समाजले सार्वजनिक सवारी साधानबाट रोयल्टी संलकन गर्दै आएको छ । १० महिनामा समाजले पौने २ करोड रुपैयाँ संकलन गरेको छ । 

रेडियो, टेलिभिजन, युट्युब भिवर्स, सीआरबीटी, पीआरवीटी, पार्टी प्यालेस, डान्सबार लगायतबाट आएको तथ्यांकका आधारमा औषतमा कसको गीत कति बज्यो निर्धारण गर्ने तयारीमा समाज रहेको छ । 

यो निर्णय हिजो (शनिबार) सम्पन्न समाजको ११ औं साधारण सभाबाट पारित गाराउने यसअघि संगीत रोयल्टी संकलन समाजले बताए पनि यससम्बन्धी कार्यपत्र नै प्रस्तुत नभएको अध्यक्ष खड्काले जानकारी दिए । उनले भने, “पहिला रोयल्टी वितरणलाई कसरी वैज्ञानिक र पारदर्शी बनाउन सकिन्छ नयाँ कार्यसमितिमा छलफल गर्नेर्छौं र तीन महिनाभित्र विशेष साधारणसभा बोलाएर रोयल्टी वितरणको मापदण्ड पारित गर्नेर्छौं ।” 

खड्काले असारसम्ममा यातायातबाट उठेको रोयल्टी वितरण गर्ने योजना बनाएको जाकारी दिए । 

यस अघि रोयल्टी संकलन समाजको अध्यक्ष सुरेश अधिकारी थिए । उनले करिव ६ वर्ष अध्यक्षको जिम्मेवारी सम्हालेका थिए । 

गीतसंगीत बजाएबापत ठूला बसले वार्षिक दुई हजार, मिनिबसले १ हजार चार सय, माइक्रोबस, ट्याक्सी र जिपले एक हजार, पिकअप भ्यानले ९ सय र टेम्पोले ८ सय रुपैयाँ रोयल्टी तिर्दै आएका छन् । 
 

प्रतिकृया दिनुहोस