दाङ । सवारी दुर्घटनामा गम्भीर घाइते भएका सांसद उत्तरकुमार वलीलाई हेलिकोप्टरबाट काठमाडौं लैजाने तयारी गरिएको छ । कोहलपुर मेडिकल कलेजमा उपचाररत सांसद वलीलाई थप उपचारको लागि काठमाडौं लैजान लागिएको हो ।
सांसद वलीका स्वकिय सचिव एमएन शाहका अनुसार यसअघि छिमेकी देश भारत उपचारका लागि लैजान भन्दै त्यहाँबाट भेन्टिलेटरसहितको एम्वुलेन्स मागिएको थियो । “चिकित्सकले केही सुधार आएको जानकारी दिएका छन् । मुटुको धड्कन चलेको छ, स्वाप्रश्वासमा सुधार आएको छ र रक्तसंचारमा समेत सुधार भएको छ,” शाहले भने ।
अझैपनि सांसद वलीको भेन्टिलेटरमै राखेर उपचार भइरहेको हुँदा खतरा टरी नसकेको बताइएको छ । तत्कालिन नेकपा एमालेवाट दाङको निर्वाचन क्षेत्र नं ३ को २ बाट प्रदेशसभामा सदस्यमा निर्वाचित सांसद वली विहीवार अस्थायी राजधानी बुटवलबाट तुलसीपुरस्थित घरतर्फ फर्कदै गर्दा दुर्घटनामा परेका थिए । घोराही–लमही सडक खण्डको चिसापानी भन्ने स्थानमा भएको दुर्घटनामा परी रुकुम पश्चिमको खलंगा गाउँपालिका नं २ मुसिकोट निवासी ३६ वर्षीया रमिता शर्माको मृत्यु भएको थियो । उनको घटनास्थलमै मृत्यु भएको दाङ जिल्ला प्रहरी प्रमुख एवं एसपी बेलबहादुर पाण्डेले जानकरी दिए ।
विहीवार बेलुका पौने ५ बजेतिर ५ नं प्रदेशका प्रदेशसभा सदस्य उत्तरकुमार वली सवार कारलाई यात्रुवाहक बसले ठक्कर दिँदा वली गम्भीर घाइते भएका छन् भने उनीसँगै अरु १३ जना घाइते भएका थिए । सांसद वलीलाई भने हात, खुट्टा र टाउकोमा गम्भीर चोट लागेको तथा छातिका ५ वटा कर– पनि भाँचिएको भन्ने खबर चिकित्सकले दिएको स्वकिय सचिव शाहले बताए । घोराहीबाट लमहीतर्फ जाँदै गरेको ना ५ ख ५५२९ नम्वरको यात्रुवाहक बसले लमहीबाट घोराहीतर्फ आउँदै गरेको सांसद वली सवार बा १८ च ६८३६ नम्वरको कारलाई घोराही ३ स्थित चिसापानी भन्ने ठाउँमा ठक्कर दिँदा उक्त दुर्घटना भएको थियो ।
कारमा सांदस वली र अर्का युवा लिला विकमात्रै सवार थिए । विक उपचारपछि घर गइसकेको प्रहरीले जानकारी दिएको छ । कार सांसद वलीले आफै चलाएका थिए ।