फेसबुकले ल्यायो म्यासेज ‘अनसेन्ड’ गर्न मिल्ने नयाँ सेवा

फेसबुकले ल्यायो म्यासेज ‘अनसेन्ड’ गर्न मिल्ने नयाँ सेवा

एजेन्सी । लामो समयदेखि माग गरिएको र फेसबुकले समेत एक वर्ष अगाडि वाचा गरेको ‘अनसेन्ड’ बटन सेवा मंगलबारबाट भने सबै प्रयोगकर्तालाई उपलब्ध हुने भएको छ । यसअघि फेसबुकका प्रमुख मार्क जुकरवर्गले गोप्य रुपमा आफ्ना म्यासेजहरु अरुको अकाउन्टबाट हटाएको पत्ता लागेपछि कम्पनीमा विवाद उत्पन्न भएको थियो । यसै घटनाको केही दिनमा नै कम्पनीले सबै प्रयोगकर्तालाई अनसेन्ड बटन प्रदान गरिने बताएको थियो । यसरी अहिले त्यही वचन पूरा गर्दै फेसबुकले विश्वभरका सबै प्रयोगकर्तालाई आफ्ना गलती सच्याउने मौका दिई अनसेन्ड बटन उपलब्ध गराएको हो । 
तरपनि प्रयोगकर्ताले यसका लागि केबल १० मिनेटको समय मात्र पाउने बताइएको छ । कुनैपनि म्यासेज पठाइसकेपछि १० मिनेटभित्रमा सो म्यासेज अर्को व्यक्तिको च्याटबाट हटाउन सकिनेछ । यसका लागि उक्त म्यासेजमा क्लिक गरी ‘रिमुभ फर एभ्रीवन’ भन्ने अप्सन चुज गर्नुपर्छ जसले सबै इन्बक्सबाट सो म्यासेज डिलिट गराइदिनेछ । यसअघि भने फेसबुकमा आफूले पठाएका म्यासेज आफ्नो इन्बक्सबाट मात्र डिलिट गर्न मिल्थ्यो तर आफ्ना साथीको च्याटमा भने यथावत् रहिरहन्थ्यो । 
तर यसरी म्यासेज अनसेन्ड गरिसकेपछि पनि पठाइएको व्यक्तिले तपाईँले म्यासेज डिलिट गरेको बारेमा भने थाहा पाउनेछन् । के म्यासेज डिलिट गरिएको भन्ने नदेखेपनि तपाईँले आफूले पठाएका टेक्स्ट हटाएको कुरा च्याटमै लेखिएको हुनेछ । यसरी यो नयाँ टुलमार्फत् मानिसहरुले अझ इमान्दार भएर कुराकानी गर्न सक्ने बताइएको छ । तर यो सेवाले पहिले पहिलेका म्यासेजमा भने काम गर्दैन । यसरी १० मिनेट भित्रमा सबै प्रयोगकर्ताले फेसबुकका म्यासज अनसेन्ड गर्न पाउने भएका हुन् ।  
 


प्रतिकृया दिनुहोस

सम्बन्धित समाचार

ad