काठमाडौं । नेकपा माओवादी केन्द्रका अध्यक्ष पुष्पकमल दाहाल (प्रचण्ड)को नेतृत्वमा नयाँ बन्न लागेको सरकारमा उनकै दलबाट सरकारमा सहभागी हुने आकांक्षी बढी देखिएका छन् ।

स्रोतका अनुसार बढी देखिए पनि सकेसम्म यसअघि नेकपा एमालेका अध्यक्ष केपी शर्मा ओली नेतृत्वमा रहेका नेताहरूलाई भने सरकारमा सहभागी नगराउने तयारी माओवादी केन्द्रले गरेको छ । तर, केही छुटाउनै नहुने भएकाले उनीहरूका बारेमा के गर्ने भन्ने टुंगो लाग्न नसकेको स्रोतले जनाएको छ । 

प्रधानमन्त्री निर्वाचन प्रक्रिया अघि बढ्दासम्म माओवादीका तर्फबाट सरकारमा सहभागी हुनेहरूको नामावली तय गर्ने माओवादी केन्द्रले जनाएको छ । 

कांग्रेससँग भएको सहमतिअनुसार दाहाल प्रधानमन्त्री बन्नेछन् भने माओवादी केन्द्रले अर्थ, सञ्चारलगायत ८ वटा मन्त्रालय पाउनेछ ।

प्रचण्डबाहेक माओवादी केन्द्रका तर्फबाट उपप्रधानसहित अर्थ र गृहमध्ये एक मन्त्रालयको जिम्मेवारी सम्हाल्ने गरी कृष्णबहादुर महरालाई मन्त्री बनाउन लागिएको माओवादी केन्द्रका एक उच्च नेताले जानकारी दिए । यसैगरी माओवादीमा नेता राम कार्कीलाई पनि यो पटक मन्त्री बनाउने पक्का भएको ती नेताले बताए । पहिलो संविधानसभाको चुनावमा पराजित भएका उनी एक्ला माथिल्लोस्तरका नेता थिए । यसपटक कार्की समानुपातिक तर्फबाट सांसद बनाइएका हुन् । यसअघि सरकारले फ्रान्स र भारतका लागि राजदूतमा सिफारिस गर्दा ती मुलुकहरूले कार्कीलाई एग्रिमो पठाएका थिएनन् । 

रुकुम–२ बाट प्रत्यक्ष निर्वाचित सांसद जनार्दन शर्मा पनि प्रचण्ड नेतृत्वको सरकारमा मन्त्री बन्ने निश्चितजस्तै भएको ती नेताले बताए । 

यसैगरी, मधेसीबाट मोरङ–४ बाट प्रत्यक्ष निर्वाचन जितेका शिवकुमार मण्डललाई पनि मन्त्री बनाउने निश्चित भएको छ । माओवादीका तर्फबाट मेची र कोशीबाट दोस्रो संविधानसभामा चुनाव जितेका उनी एक्लो माओवादी नेता हुन् । त्यसैले पनि उनलाई कुनै एउटा मन्त्रालयको जिम्मेवारी दिने गरी मन्त्री पदमा पठाउने तयारी गरेको ती नेताले बताए । 

दलित तथा महिलाको प्रतिनिधित्व हुने गरी सुर्खेतबाट समानुपातिक सांसद रहेकी सीता नेपालीलाई पनि मन्त्री बनाउने छलफल चलेको छ । यसैगरी आदिवासीको प्रतिनिधित्व हुने गरी बर्दिया–४ बाट चुनाव जितेका मानबहादुर थारु यो पटकको मन्त्रीमण्डलमा जाने सम्भावना रहेको माओवादी स्रोेतले बतायो । 

सल्यानबाट लगातार दुईपटक चुनाव जितेका टेकबहादुर बस्नेतलाइ पनि यो पटक माओवादी केन्द्रले मन्त्री बनाउने तयारी गरेको माओवादी केन्द्र स्रोत बताउँछ । 

गोरखा–२ बाट निर्वाचन जितेका हितराज पाण्डे पनि माओवादीको तर्फबाट नयाँ सरकारमा मन्त्री बन्दैछन् । 

नारायणकाजी श्रेष्ठ गुटबाट चुनाव जितेका तथा केपी ओली सरकारमा शिक्षामन्त्री भएका गिरिराजमणि पोखरेललाई पुनः मन्त्री बनाउन दबाब परेको र उनी पनि मन्त्री बन्ने सम्भावना रहेको ती नेताले जानकारी दिए । पोखरेल तत्कालीन नेकपा माआवादीसँग एकता हुनुपूर्वका जनमोर्चाका नेता हुन् । पूर्व जनमोर्चाको तर्फबाट यसपटक प्रत्यक्ष निर्वाचनमा विजयी हुने उनी एक्ला नेता हुन् । पोखरेलले महोत्तरी–१ बाट चुनाव जितेका हुन् । 

माओवादी केन्द्रले सरकारमा जानेको अन्तिम टुङ्गो छिट्टै लगाउने तयारी गरेको स्रोतले बतायो ।