काठमाडौंमा रहेका कूटनीतिक समुदायलाई शुक्रबार देशको पछिल्लो अवस्थाबारे जानकारी गराउँदै प्रधानमन्त्री केपी शर्मा ओली (बीचमा) परराष्ट्रमन्त्री प्रदीप ज्ञवाली (बायाँ) र अर्थमन्त्री डा. युवराज खतिवडा (दायाँ) : तस्बिर सौजन्य प्रधानमन्त्री कार्यालय
संसद्मा दुई तिहाइ बहुमतको न्यानो समर्थनमा रमाइरहेको वर्तमान सरकारका लागि नेकपा (नेकपा)का दुईमध्येका एक अध्यक्ष पुष्पकमल दाहालले समस्यामा पारेका छन् । गत माघ ११ गते शुक्रवार प्रधानमन्त्री केपी ओली स्विजरल्यान्डको डाभोस भ्रमणबाट स्वदेश फर्किने क्रममा बाटोमै रहँदा दाहालले भेनेजुएलामा अमेरिकी सरकारको व्यवहारको विषयमा नेकपाको तर्फबाट तिखो वक्तव्य जारी गरे ।
दाहालको वक्तव्यले अप्ठेरोमा परेको सरकारले अर्को वक्तव्य जारी गर्यो । सरकारी वक्तव्यमा दाहालको जस्तो ठाडो भाषा प्रयोग नभए पनि भेनेजुएलाको राजनीति त्यहीँको आन्तरिक विषय भएकोेले बाहिरी हस्तक्षेप हुन नहुने भनियो । तर, अमेरिकाले भेनेजुएलाको राजनीतिमा नेपालको प्रतिक्रिया रुचाएन । नेपालको वक्तव्यलाई अमेरिकी सरकारले निकै गंभीरतापूर्वक लिँदै परराष्ट्रको वक्तव्यलाई पनि दाहालकै वक्तव्यको ‘राम्रो सम्पादन’ भन्ने संज्ञा दियो ।
यस विषयमा अन्नपूर्ण पोस्टले माघ १८ गते शुक्रवार पुष्पकमल दाहालले आफूलाई फसाइयो भनेर आत्मस्वीकृती गरेको समाचारलाई मुख्य समाचार बनायो । पोस्टले ‘विदेश नीतिमा यथार्थवाद’ शीर्षकमा सम्पादकीय लेख्दै नेपालबाट यस्तो प्रकारको वक्तव्य आउनु हुँदैन थियो भन्ने अडान लियो । पोस्टका सम्पादकका अनुसार, “सत्तारुढ दल नेकपाका दुईमध्ये एक अध्यक्ष पुष्पकमल दाहालले भेनेजुएलाको मामिलामा अमेरिकालाई गैरकूटनीतिक शब्दावली प्रयोग गरेर दाहालले युद्धकालीन धङधङीको पुनरावृत्ति गरे । अध्यक्षको त्यो ढंगको विज्ञप्ति आएपछि जुन हतारोसाथ सरकारले विज्ञप्ति जारी गर्यो त्यसले पनि अर्को अपरिपक्वता दर्शाएको छ ।”
सोही दिन पोस्टका स्तम्भकार सुधीर शर्माले पनि ‘भेनेजुएला–भाइचारका परकम्प’ शीर्षकको लेखमा नेपाल वैदेशिक चुनौतीहरूको चाङछेउ पुगेको र यसलाई चतुरतापूर्वक चिर्न नसक्दा नसोचिएको संकट आउन सक्ने संकेत गरे ।
नेपाल सरकारले यस परिस्थितिको आभास पाएर नेपालका सम्पूर्ण कूटनीतिक नियोगका प्रमुखहरूलाई बोलाएर सरकारको काम कारबाहीको विषयमा प्रष्ट पार्दै लोकतन्त्र र सुशासनप्रति सरकार प्रतिबद्ध रहेको दोहो¥यायो । तर, यस प्रेस ‘ब्रिफिङ’ मा अमेरिकी राजदूत र्यान्डी बेरी अनुपस्थित रहेको विषयलाई शनिवारका राजधानी तथा नागरिकले मुख्य समाचार बनाए ।
कान्तिपुरले भने शनिवारको अंकमा ‘नेपाल–अमेरिका सम्बन्ध चिसो’ शीर्षकमा ब्यानर समाचार बनायो । कान्तिपुरका अनुसार नेपाली राजदूतलाई अमेरिकामा ध्यानकर्षणका लागि विदेश मन्त्रालयमा बोलाइएको छ । सो दैनिकले अमेरिकी दूतावासका एक प्रवक्तालाई कोट गर्दै अमेरिकी सरकारले नेपालसँग पार्टीको वक्तव्य र सरकाको धारणा एउटै भए/नभएको बारेमा डिसी र काठमाडौं दुवै ठाउँमा जानकारी लिएको बताएको छ । यता दाहालले शुक्रवार वक्तव्य जारी गर्दै भेनेजुएलामा अमेरिकाको साम्राज्यवादी हस्तक्षेप भएको भन्ने आफ्नो अघिल्लो वक्तव्य सही भएको र आफू त्यसमा अडिग रहेको बताएका छन् ।
नेपालको विजयमा पत्रिकाको खुसी
नेपालको राष्ट्रिय टिमले अन्तर्राष्ट्रिय क्रिकेट प्रतियोगितामा प्राप्त गरेको सफलताले नेपालीलाई गौरव गर्ने एक सशक्त कारण बनेको छ । गएको साता नेपालका दैनिक पत्रिकाले नेपाली क्रिकेटका विभिन्न आयाममा खुसी मनाएका छन् ।
नेपालले एक दिवसीय क्रिकेट खेल्ने राष्ट्रको रुपमा खेलेको पहिलो अन्तर्राष्ट्रिय खेलको सिरिजमा युएईलाई पराजित गरेर कीर्तिमान कायम गरेको छ । गत सोमवार माघ १४ गते युएईलाई तेस्रो र अन्तिम एक दिवसीउ खेलमा पराजित गर्दै नेपालले शृंखला २–१ ले जितेको छ । यो समाचारलाई समीक्षित सबै पत्रिकाले (नयाँ पत्रिकाले मध्य समाचार बनाएको) मुख्य समाचार बनाए पनि सबैभन्दा ठूलो स्थान कान्तिपुरले दियो । अन्नपूर्ण पोस्टले रंगीन पृष्ठभूमिमा शतक प्रहार गर्ने नेपालका कप्तान पारस खड्काको तस्बिरसहित मोहक ढंगले समाचार प्रकाशित गर्यो ।
यही सिरिजको दोस्रो एक दिवसीय क्रिकेटमा नेपालका ब्याट्सम्यान रोहितकुमार पौडेलले विश्व क्रिकेटमा पुरुषतर्फ अर्धशतक पूरागर्ने सबैभन्दा कान्छा खेलाडीको रेकर्ड तोडिदिएका छन् । उनले पाकिस्तानका खेलाडी शाहिद अफ्रिदीको १६ वर्ष २१७ दिनको रेकर्ड तोडेका हुन् । पौडेलले अर्ध शतक हानेको दिन उनी १६ वर्ष १४६ दिनका मात्र थिए । रोहितको विश्व रेकर्डलाई नागरिक, कान्तिपुर तथा हिमालय टाइम्सले मुख्य समाचारको स्थान दिए ।
उल्लेख्य समाचार
राजधानी दैनिकले नेपालका उच्च पदस्थ व्यक्तिहरू कसरी सरकारी सुविधाको दुरुपयोग गर्दैछन् भन्ने सिरिजमा एक नयाँ अध्याय थपेको छ । राजधानीको बुधबार माघ १६ को अंकमा प्रकाशित समाचारअनुसार सर्वोच्च अदालतका पूर्वप्रधानन्यायाधीशहरूले आफैँले गरेको फैसलाविपरीत सेवा सुविधा लिँदै आएका छन् । सो दैनिकका अनुसार सर्वोच्चको आदेश लत्याउँदै सेवासुविधा लिने पूर्वप्रधानन्यायाधीशहरूमा सुरेन्द्रप्रसाद सिंह, ओमभक्त श्रेष्ठ, मोहनप्रसाद शर्मा, दिलिपकुमार पौडेल, मीनबहादुर रायमाझी, खिलराज रेग्मी, दामोदरप्रसाद शर्मा, रामकुमारप्रसाद साह, कल्याण श्रेष्ठ, सुशीला कार्की, गोपाल पराजुली र ओमप्रकाश मिश्र रहेका छन् । राजधानीका अनुसार यी न्यायाधीशले सर्वोच्चको फैसलाविपरीत सरकारी गाडीको नंबर निजी बनाएर प्रयोग गरिरहेका छन् । राजधानीले कुन सरकारी नंबरको कुन कंपनीको मोटर निजी कुन नंबरमा परिवर्तन गरिएको छ भन्ने विवरण पनि दिएको छ ।
राजधानीलेनै बिहीबारको अंकमा अति विपन्न तथा गरिब गरिवारका बिरामीका लागि सरकारले अस्पतालमा छुट्टै शैयाको अनिवार्य व्यवस्था गरे पनि त्यसअनुसार सेवासुविधा विपन्नले नपाएको समाचार बनाएको छ ।