काठमाडौं । एकदिवसीय अन्तर्राष्ट्रिय शृङ्खलामा पहिलो शतक बनाएका नेपाली राष्ट्रिय क्रिकेट टोलीका कप्तान पारस खड्कालाई विभिन्न क्षेत्रका क्रिकेट प्रशंसकले बधाई दिएका छन् । युनाइटेड अरब इमिरेट्स (युएई) विरुद्धशतक प्रहार गरेका कप्तान खड्कालाई सामाजिक सञ्जाल ट्वीटर मार्फत् बधाई दिएका छन् ।

नेपालका राजनीतिक दलका नेता, कलाकार, साहित्यकारदेखि विश्व क्रिकेटमा ख्याति प्राप्त क्रिकेटरसम्मले ट्वीटरमार्फत् पारसलाई बधाई दिएका छन् । नेपाली कांग्रेसका नेता गगन थापाले आईसीसीले डिजाइन गरेको तस्बिर सेयर गर्दै बधाई दिएका छन् ।

यस्तै, अफगानिस्तानका स्पिनर राशिद खानले ‘नेपाली क्रिकेटमा पहिलो एकदिवसीय शतक । पक्कैपनि खेल हेर्दा आनन्द महसुस भयो तिम्रो पहिलो सय रनले खुुसी दिएको छ,’ भन्दै पारसलाई मेन्सन गर्दै ट्वीट गरेका छन् ।

साहित्यकार बुद्धिसागरले आईसीसीले डिजाइन गरेको तस्बिर सेयर गर्दै वाउ! ऐतिहासिक भन्दै बधाई दिएका छन् । त्यस्तै, अर्का साहित्यकार नयनराज पाण्डेले ‘नेपालको अन्तर्राष्ट्रिय एकदिवसिय क्रिकेटको इतिहासमा पहिलो शतक बनाउने कप्तान पारस खड्कालाई हार्दिक बधाई । सुखद खबर नेपालमा क्रिकेटबाटै मात्र पाइने भइयो के रे !’ भन्दै बधाई दिएका छन् ।

कलाकार प्रमोद खरेलले ‘कप्तान पारसको मात्रै होइन देशकै पहिलो एकदिवसीय शतक हो । त्यसैले जय जय गरौं,’ भन्दै ट्वीट गरेका छन् । आईसीसी एकेडेमी ओभलमा भएको खेलमा तेस्रो विकेटका रुपमा मैदान प्रवेश गरेका पारसले १सय ९ बलमा १ सय १५ रन बनाएका हुन् । १ सय १५ रन बनाउने क्रममा खड्काले १५ चौका र १ छक्का प्रहार गरे ।