काठमाडौं । युनाइटेड अरब इमिरेट्स (यूएई)विरुद्धको तेस्रो एकदिवसीय अन्तर्राष्ट्रिय क्रिकेटमा नेपालका कप्तान पारस खड्काले शतक पूरा गरेका छन् । एकदिवसीय अन्तर्राष्ट्रिय क्रिकेटमा शतक बनाउने पारस पहिलो नेपाली खेलाडी हुन् ।
कप्तान पारसले ३४.३ ओभरमा इमरान हैदरको बलमा चौका हान्दै शतक पूरा गरेका हुन् । उनले शतक पूरा गर्ने क्रममा ९६ बलमा १३ चौका र १ छक्का हाने । उनले यसअघि नेदरल्यान्ड्सविरुद्धको दोस्रो एकदिवसीय अन्तर्राष्ट्रियमा अर्धशतक पूरा गरेका थिए । पारसले लिस्ट ‘ए’ क्रिकेटमा पनि दुई शतक पूरा गरिसकेका छन् ।
३५ ओभर सकिँदा नेपालले ५ विकेट गुमाएर १ सय ९९ रन बनाएको छ । नेपालका कप्तान पारस खड्का १ सय ५ र आरिफ शेख ५ रन बनाएर खेलिरहेका छन् । नेपाललाई जितका लागि १५ ओभरमा ५६ रनको आवश्यक छ ।
ओपनर विनोद भन्डारी ९ रन बनाएर पवेलियन फर्किदा ज्ञोनन्द्र मल्ल ३१, सन्दीप जोरा १९ र दीपेन्द्रसिंह ऐरी ६ रन बनाएर आउट भए । रोहितकुमार पौडेल १६ रन बनाए । यूएईका इमरान हैदर र अशफाक अहमदले समान २ तथा मोहम्मद नाभीदले १ विकेट लिए ।
त्यसअघि अन्तिम दश ओभरमा यूएईले १ सय १४ रन जोडेपछि घरेलु टोली २ सय ५५ रनको लक्ष्य प्रस्तुत गरेको थियो । शाइमन अनवारले ८७ रन बनाएपछि दुबईस्थित आइसीसी एकेडेमीमा टस हारेर ब्याटिङका लागि निम्त्याइएको यूएईले निर्धारित ५० ओभरमा ६ विकेट गुमाएर २ सय ५४ रन बनाएको थियो । अनवार बाहेक मोहम्मद बूताले अविजित ५९ रन बनाए भने सीपी रिजवानले ४५ रन जोडेका थिए ।