काठमाडौं । कांग्रेसको अवरोधकाबीच पारित भएको चिकित्सा शिक्षा विधेयक राष्ट्रियसभामा पेश भएको छ । कांग्रेसको अवरोधका कारण सोमबारै दुईपटक बैठक स्थगित भएको थियो । तेस्रो पटक बैठक शुरू हुनेबित्तिकै कांग्रेस सांसदरूले वेल घेराउ गरेपछि सभाध्यक्षले शिक्षामन्त्री गिरिराजमणि पोखरेललाई चिकित्सा शिक्षा विधेयकमाथि विचार गरियोस् भन्ने प्रस्ताव पेस गर्न समय दिए ।
सभाध्यक्षले चिकित्सा शिक्षा विधेयकमाथि छलफल गर्दा अवरोध नगर्न आग्रह गरे पनि कांग्रेस सांसदहरूले नाराबाजी गरिरहेका कारण नाम टिपाउन सक्ने अवस्था रहेन । त्यसपछि सभाध्यक्षले निर्णयार्थ प्रस्तुत गरे । प्रस्तावको विपक्षमा मत नपरेकाले प्रस्ताव सर्वसम्मतिले स्वीकृति भएको घोषणा सभाध्यक्षले गरे ।
अब राष्ट्रियसभाका सदस्यहरूले चिकित्सा शिक्षा विधेयकमाथि संशोधन हाल्न सक्नेछन् । राष्ट्रियसभाको अर्को बैठक माघ १७ गते बिहीबार दिउँसो २ बजेका लागि डाकिएको छ ।
