बिहीबार कलाकार तथा निर्माता निर्मल शर्माले आफ्नो फेसबुक अकाउन्टमा पोस्ट गरे, “हरेक महिना ५–६ करोड डुबिरहेको चलचित्र नगरीका संघसंस्थाहरू पिकनिक जान्छन् । मन्त्री भेटेर फोटो खिच्छन् । भिसा लिन्छन् । अवार्ड गर्छन् । साधारणसभा र चुनावताका भयंकंरै सल्बलाउँछन् । तर, चलचित्र किन बनाउने, कसरी बनाउने, केका लागि बनाउने, कसरी देखाउने र के बनाउने भन्ने विषयमा चाहिँ ‘बर्फी’ फिल्मको रणवीर कपुरजस्तै छन् ।”
कलाकार शर्माको यो स्टाटसको पहिलो हरफले चलचित्रको लगानी डुबिरहेको बताउँछ । बीचका हरफले आकर्षक मानिएका अमेरिका, अस्ट्रेलियाजस्ता देश जान कलाकारहरूले चलचित्रलाई प्रयोग गरिरहेको दाबी गर्छन् । अन्तिम हरफले चलचित्र बनाउन ढंग नपुर्याउनेहरू चलाउन नजानिरहेको बताउँछ ।
स्टाटसमार्फत निमर्ल शर्माले आफ्नै उद्योग र सहकर्मीहरूको चर्को आलोचना गरेका छन् । उनले यथार्थको धरातलमा उभिएर टिप्पणी गरेका छन् । एकैदिन चारवटासम्म नेपाली फिल्म प्रदर्शन हुन्छन् । त्यसमा हिन्दी र अंग्रेजी भाषाका फिल्म पनि थपिन्छन् । त्यसको उदाहरण हो— यही माघको १८ गते । त्यो दिन अपेक्षा गरिएका तीन ठूला चलचित्र आमनेसामने हुँदै छन्— ‘रणवीर’, ‘सयकडा दश’ र ‘गोपी’ । ‘गोपी’ चलचित्र समीक्षक तथा रंगपत्रकार दीपेन्द्र लामाले निर्देशन गरेका हुन् । उनले यसअघि ‘घामपानी’ बनाएका थिए ।
‘रणवीर’ दक्षिण भारतीय फिल्ममा सहायक निर्देशन गरेका गोविन्दसिंह भण्डारीले निर्देशन गरेको फिल्म हो । ‘प्रेम गीत’बाट प्रसिद्धि कमाएका रामशरण पाठकले ‘सयकडा दश’ निर्देेशन गरेका हुन् ।
तीनवटै फिल्मा संयोग परेको छ— कथाकारको । सबै फिल्मका कथा निर्देशक स्वयंले लेखेका छन् ।
युवापुस्ताले अमेरिका, अस्ट्रेलियालाई सपनाको संसार बनाइरहेका बेला ‘गोपी’ले नेपालमै गाई पालेर बस्छु भन्ने एक शिक्षित युवाको कथा भन्छ । ‘गोपी’को कथा विपीन कार्कीको काँधमा छ । यो फिल्मको ट्रेलर हेरेर श्रममन्त्री गोकर्ण विष्टले कलाकार र निर्देशकलाई मन्त्रालयमै बोलाएर भेटेका थिए । सुरक्षा पन्त, वर्षा राउत विपीनसँगै मुख्य भूमिकामा छन् ।
रामशरण पाठकको लेखन तथा निर्देशनमा तयार भएको ‘सयकडा दश’ले ‘भ्रष्टाचारविरुद्ध प्रेम’ नारा राखेर आफूलाई प्रचार अभियानमा होमेको छ । पाठकले यसको कथा हास्य कलाकारद्वय मनोज गजुरेल र राजाराम पौडेललाई बोकाइदिएका छन् । ‘सयकडा दश’ मनोजको पहिलो फिचर फिल्म हो भने राजाराम पौडेलले पहिलोपटक यही फिल्ममा लगानी गरेका छन् ।
‘रणवीर’ धोकाधडी र हुलहुज्जतविरुद्धको एक्सनप्रधान फिल्म हो । यसको मुख्य पात्रका रूपमा सुशील सिटौला उभिएका छन् । सुशीलसँग भिडन्तमा उत्रिएका छन्— खलपात्र प्रशान्त ताम्राकार । यो फिल्मको ट्रेलरलाई दक्षिण भारतीय फिल्मसँग तुलना गरिएको छ । यसबाट मोडल सुभेक्षा खड्काले डेब्यु गर्दै छिन् ।
लगातार फिल्मको बजार ओरालो लागिरहेका बेला अपेक्षा गरिएका चलचित्र एकैदिन प्रदर्शनमा आउँदा त्यसको सीधा असर बक्स अफिसमा देखिन्छ । बउिडका ठूला फिल्मसँग भिड्न हच्किने निर्माता तथा निर्देशकहरू नेपाली फिल्मसँग भने डराउँदैनन् । यसलाई चलचित्रकर्मीले ‘जुगाँको लडाइँ’ भनी टिप्पणी गर्दै आएका छन् ।
ठूला ब्यानरका फिल्मसँग पनि कतिपय साना फिल्म एउटै मितिमा प्रदर्शन भइरहेको पाइन्छ । सानो बजार रहेको नेपालमा वार्षिक सवा सयभन्दा धेरै फिल्म निर्माण तथा प्रदर्शन हुने गरेका छन् । चार दर्जनभन्दा धेरै फिल्म नेपाली बजारले थेग्न नसक्ने निर्माता, निर्देशक तथा कलाकार अशोक शर्मा बताउँछन् । उनका अनुसार ओभरसिज मार्केट नखोजेसम्म ५० भन्दा बढी फिल्म सुरक्षति हुन सक्दैनन् ।
वार्षिक ८० प्रतिशत चलचित्र घाटामा गए पनि यो क्षेत्रमा लगानी भने घटेको छैन, बढेको बढ्यै छ ।
‘रणवीर’का निर्माता दीपेन्द्र रेग्मी आफूले फिल्म प्रदर्शनको डेट लिँदा अरूले मिति नतोकेको भन्दै फिल्म जुधाउने मनशाय नरहेको बताए । “हप्ताका दुइटासम्म फिल्म नेपाली मार्केटले धान्न सक्छ,” उनी भन्छन्, “१८ गते रिलिज हुने अरू फिल्म र ‘रणवीर’ फरक–फरक विधाका भएकाले हामीलाई खासै फरक पर्दैन । ‘रणवीर’ पूर्ण व्यावसायिक फिल्म हो ।”
‘सयकडा दश’ निर्देशक पाठक दुईभन्दा धेरै फिल्म एकैदिन रिलिज हुँदा त्यसको असर व्यापारमा पर्ने स्वीकार्छन् । “शो बाँडिन्छ । एउटै मितिमा धेरै फिल्म रिलिज हुँदा दर्शकले रोज्न त पाउनुहुन्छ तर त्यसको असर बक्स अफिसमा देखिन्छ,” उनी भन्छन्, “हामीले डेट लिँदा ‘रणवीर’मात्रै थियो । ‘रणवीर’ र हाम्रो चलचित्र फरक–फरक विधा र विषयका भएकाले दुइटासम्म ठीकै हुन्छ भनेर माघ १८ मा आउने निर्णय गरेका हौं । पछि अर्को पनि आएपछि एउटै दिनमा तीनवटा फिल्म भए ।”
सबैभन्दा पछि रिलिज डेट लिएको ‘गोपी’का निर्देशक दीपेन्द्र लामा वितरकले दिएको डेटमा आफ्नो फिल्म आउन लागेको बताउँछन् । “हामी आफूले भन्दा पनि डिस्ट्रिब्युटरले दिएको समय हो माघ १८ गते,” लामाले भने, “हामीले घरेलु बजारलाई मात्रै हेरेर हुँदैन, ओभरसिज मार्केटलाई पनि ध्यान दिनुपर्छ । हलिउड र बलिउडका ठूलो हाइप भएका फिल्मसँगै रिलिज गर्दा ओभरसिज मार्केट राम्रो हुँदैन । यसमा पनि ध्यान दिनुपर्ने हुन्छ ।”
एकैपटक तीन–चारवटा फिल्म प्रदर्शनमा आउँदा त्यसको असर घरेलु बजारमा भने देखिने उनको भनाइ छ ।