एजेन्सी । मरुभूमीको उच्च तापमानमा भोक र तिर्खाले आत्तिएका आप्रवासीहरुका लागि खाना र पानी छाडिदिने चार मानवअधिकारवादी स्वयंसेविकाहरुलाई अमेरिकी अदालतले शुक्रबार दोषी ठहर गरेको छ । ‘नो मोर देथ’ नामक एक मानवअधिकारवादी संगठनसँग आबद्ध ती स्वयंसेविकाहरुले एरिजोनाको मरुभूमी हुँदै मेक्सिकोबाट अमेरिकी सीमातर्फ जाने शरणार्थीहरुको सहयोग गर्न २०१७ अगस्टमा क्यान्ड खाना र पानी राखिदिएका थिए । यसै क्रममा सो क्षेत्रका अधिकारीले तिनीहरुलाई  फेला पारेका हुन् । 

यसरी चारै स्वयंसेविकालाई ६ महिनासम्मको जेल सजायँ हुन सक्ने बताइएको छ । त्यसरी बिना अनुमति निषेधित क्षेत्रमा प्रवेश गरि व्यक्तिगत सामान छाडि कानुनको उल्लंघन गरेको भन्दै अदालतले यस्तो फैसला सुनाएको हो । 

एक दशकपछि पहिलोपटक कुनै मानवअधिकारवादी स्वयंसेवकमाथि कानुनी कारबाही हुन लागेको समाचार एजेन्सी असोसिएट प्रेसले जनाएको छ । अहिले यो घटनालाई मेक्सिको र अमेरिकाबीच आप्रवासी र सीमा सुरक्षालाई लिएर चर्किएको विवादसँग जोडिएको छ ।  

एरिजोना स्थित ‘नो मोर देथ’ संगठनले आप्रवासीहरुलाई जीवनोपयोगी सामग्री प्रदान गर्दै आएको छ । तथ्याङ्क अनुसार १९९९ देखि हालसम्म ३ हजार आप्रवासीहरुको सीमा पार गर्ने क्रममा मृत्यु भएको छ । यसरी सबैसँग जिवित रहन आवश्यक सामग्रीको पहुँच हुनुपर्छ भन्ने मान्यतका आधारमा संगठनको स्थापना गरिएको हुनाले कार्यकर्ताहरु अप्रवासीहरुको ज्यान बचाउने प्रयासमा जुटेको बताइएको छ । यस विषयमा संगठनकी एक स्वयमसेविका क्याथरिन गेफिनीले भनेकी छन्, ‘तिर्खाले मर्न लागेको व्यक्तिलाई पानी दिनु यदि अपराध हो भने देशको कानुनमा मानवता कहाँ छ ? ’ 

तर अदालतले भने उनीहरुमाथि अवैध तरिकाले आप्रवासीहरु भित्र्याउने प्रयास गरेको अभियोग समेत लाग्न सक्ने बताएको हो । यसरी यो घटनाले अहिले देशभित्रका अन्य सहयोगीहरुलाई पनि चुनौती दिइरहेको संगठनको भनाइ छ ।  – वासिङटन पोस्ट