एजेन्सी । सेरेना विलियम्सले शीर्ष वरियाताका सिमोना हेलेपलाई सोमबार २–१ को सेटमा हराउँदै अस्ट्रेलियन ओपनको क्वार्टरफाइनलमा स्थान बनाएकी छिन् । २३ पटकको ग्रान्डस्लाम विजेता सेरेनाले रोमानियाकी हेलेपलाई ६–१, ४–६, ६–४ को सेटमा रहउँदै क्वार्टरफाइनलमा स्थान बनाएकी हुन् ।

३७ वर्षिया अमेरिकाकी सेरेनाले पहिलो सेट जित्न २० मिनेट लगाएकी थिइन् । तर दोस्रो सेटमा रोमानियाकी २७ वर्षिया हेलेपले  पूनरागमन गर्ने संकेत गरेकी थिइन् । १६औं वरियाताकी सेरेनाले अन्तिम तथा निर्णायक सेट जित्दै क्वार्टरफाइनलमा स्थान बनाइन् । सेरेनालाई हेलेपमाथि विजय हासिल गर्न १ घन्टा ४७ मिनेट समय लगाएकी थिइन् । 

सेरेनाले अब क्यारोलिना प्लिसकोभासँग सेमिफाइनलका लागि प्रतिस्पर्धा गर्नेछिन् । जुन २०१८ को यूएस ओपनको क्वार्टरफाइनलको सम्झना हुनेछ । यूएस ओपनको क्वार्टरफाइनलमा सेरेना विजयी भएकी थिइन् ।

“यो निकै प्रतिस्पर्धात्मक खेल हुनेछ । आजका केही अंक निकै महत्वपूर्ण रह्यो,” सेरेनाले भनिन्, “म एक लडाकु हुँ । कहिल्यौं हरेस खादिन । मैले प्रत्येक अंकका लागि संघर्ष गरे ।”

सातौं वरियाताकी प्लिसकोभाले स्पेनकी गारविन मुगुरुजालाई २–० को सेटमा पराजित गरेकी थिइन् । प्लिसकोभाले चौथो चरणमा ६–३, ६–१ को सेटमा नतिजा निकालेकी हुन् ।

पूरुषतर्फ जापानका केइ निशिकोरीले पनि अन्तिम ८ मा स्थान बनाए । आठौं वरियाताका निशिकोरीले स्पेनका पाब्लो कारेनो बुस्टालाई ३–२ को सेटमा पराजित गरेका हुन् । पहिलो सेट ६–७(८१/०)ले गुमाएका निशीकोरीले दोस्रो सेट पनि ४–६ ले गुमाएका थिए । तर बाँकी सेटमा जापानका निशिकोरीले पुनरागमन गरे । निशिकोरीले बाँकी सेट ७–६(७/४), ६–४, ७–६(१०/८) को सेटमा जितेका थिए । उनले अब शीर्ष वरियाताका नोभाक जोकोभिच र ड्यानियल मेडभेडेभबीचको विजेतासँग प्रतिस्पर्धा गर्नेछन् ।