पाल्पा । नेपाली कांग्रेसका वरिष्ठ नेता रामचन्द्र पौडेलले विपक्षी दलको नेताको अनुपस्थितिमा सरकारले संवैधानिक परिषद् बैठकबाट निर्णय गरेर संविधानको मर्ममाथि प्रहार गरेको बताएका छन् ।
कांग्रेस पाल्पाले आयोजना गरेको कार्यकर्ता भेटघाटमा नेता पोडेलले विपक्षी दलको नेता बिना संवैधानिक परिषद्को बैठकबाट सरकारले विभिन्न आयोगमा नियुक्ति गरेको प्रति आपत्ति जनाए । ‘‘सरकारले विपक्षी दलको नेता बिनाको बैठक राखेर संविधानको मर्ममाथि प्रहार गरेर संवैधानिक व्यवस्थालाई चुनौती दिने काम गरेको,’’ उनले भने, ‘‘यो संवैधानिक परिषद्माथि चुनौति दिएर आफ्ना मान्छे नियुक्ति गर्ने काम आपत्तिजनक छ ।’’
सरकारले प्रमुख विपक्षी दलको नेताको अनुपस्थितिमा आइतवार विभिन्न ५ संवैधानिक आयोगमा अध्यक्ष नियुक्त गरेको थियो । नेता पौडेलले विपक्षी दलको नेताको अनुपस्थितिमा बसेको बैठकले कसरी काम गर्न सक्छ भनि प्रश्नसमेत गरे ।
जातिय, धार्मिक तथा क्षेत्रियताको मुद्दा कांग्रेसले बोक्न नसक्ने भन्दै उनले भने, ‘‘जातिय, धार्मिक तथा क्षेत्रियताको मुद्दा कांग्रेसले बोक्ने होइन । यी अराजनीतिक विषय हुन । कांग्रेस भनेको राजनीति पार्टी हो । लोकतन्त्रले नै सवैलाई अधिकार दिएको हो ।’’
कांग्रेसको महासमिति बैठकले अनुपम लोकतान्त्रिक र अनुपम समावेशी विधान दिएको भन्दै उनले अब कार्यसमितिको समयावधि बढाउन नहुने बताए । ‘‘मैले भन्दै आएको छु, अब टाइम्ली महाधिवेशनमा जानुपर्छ,’’ पौडेलले भने, ‘‘यसो गर्न सकिएन भने पार्टीको हितमा हुँदैन् । तोकिएको समयसिमा नै महाधिवेशन गराउनुपर्छ ।’’
कांग्रेसको सिंगो कार्यसमितिले पार्टीले निर्वाचनमा ब्यहोर्नु परेको पराजयको जिम्मा लिइसकेको भन्दै उनले चुनावी हारको जिम्मेवारी लिएर आफ्नै कार्यकाल बढाउन नहुनेमा जोड दिए ।