एजेन्सी । साविक विजेता रोजर फेडेरर ग्रिसका स्टेफानोस टिसिटिसिपससँग अप्रत्यासित रुपमा पराजित हुँदै अस्ट्रेलियन ओपनको अन्तिम १६ बाट बाहिरिएका छन् । तेस्रो वरियाताका फेडेररलाई ३–१ को सेटमा पराजित गदै क्वार्टफाइनलमा स्थान टिसिटिसिपसको करियरमै यो सबैभन्दा ठूलो सफलता हो ।
स्विट्जरल्यान्डका फेडेरर ६–७ (११/१३), ७–६(७/३), ७–५, ७–६(७/५) सेटमा पराजित भएका हुन् । ६ पटक उपाधि जितिसकेका ३७ वर्षे फेडेरर १६ वर्षमा अस्ट्रेलियन ओपनको क्वार्टरफाइनलमा स्थान बनाउन नसकेको यो दोस्रो पटक हो ।
“अहिले म विश्वकै सबैभन्दा खुशी मानिस हुँ । यसको बर्णन गर्न म सक्दिनँ,” पहिलो पटक अस्ट्रेलियन ओपनको क्वार्टरफाइनलमा स्थान बनाउन सफल २० वर्षे टिसिटिसिपसले भने, “हाम्रो खेलमा फेडेरर लिजेन्ड हुन् । म उनलाई धेरै सम्मान गर्छु । उनले धेरै राम्रो टेनिस खेल्दै आएका छन् । मैले ६ वर्षको उमेरदेखी उनलाई हेर्दै आएको छु । रोड लभर एरेनामा उनलाई भेट्दा मेरो सपना पूरा भएको थियो । र अहिले उनलाई हराउँन सफल भएको छु । म यो क्षणको वर्णन गर्नै सक्तिनँ ।”
लगातार तेस्रो पटक उपाधि जित्ने लक्ष्यमा रहेका फेडेरर मेलबर्नमा कीर्तिमानी सातौं पटक उपाधि जित्न चाहन्थे । तर २० पटकका ग्रान्डस्लाम विजेता फेडेररको यात्रा अन्तिम ३२ मै टुंगिएको छ । फेडेररले एटिपी होपम्यान कपमा पनि टिसिटिसिपसलाई संघर्ष गर्नुपरेको थियो । उनले ७–६(७/५), ७–६(७/४) को सेटमा हराएका थिए ।
“यस्तो खेलमा धेरै कुराले असर गर्छ । सेट पोइन्टमा मेरो राम्रो हुन सकेको छैन,” फेडेररले भने, “मैले होपम्यान कपमा पनि राम्रो गर्न सकेको थिइँन । त्यसैले केही गलत भइरहेको छ । जुन धेरै निराशाजनक छ ।”