काठमाडौं । प्रस्तावित विवेकशील नेपाली दलले डा गोविन्द केसीसँग भएको सम्झौता कार्यान्वयनको जिम्मेवारी प्रधानमन्त्री केपी शर्मा ओलीले लिनुपर्ने बताएको छ । डा केसीको १६ औं सत्याग्रह र स्विस बैंकमा थुपारिएको कालो धन बारे विज्ञप्तीमार्फत् धारणा सार्वजनिक गर्दै विवेकशील नेपाली दलले सम्झौता कार्यान्वयनको जिम्मेवारी प्रधानमन्त्री ओलीले लिनुपर्ने बताएको हो ।
‘‘डा केसीसँग चिकित्सा शिक्षा विधेयक सम्बन्धमा सरकारले सम्झौता गरेकाले उक्त सम्झौताको पालना गरेर मात्रै समस्याको निकास निस्कन सक्छ । त्यसका लागि सम्झौता कार्यान्वयनको जिम्मेवारी प्रधानमन्त्री स्वयम्ले लिनुपर्छ,’’ प्रस्तावित दलका केन्द्रीय सदस्य रमेश पौड्यालद्वारा जारी विज्ञप्तीमा भनिएको छ ।
सरकार अझै पनि मौन बस्दै आफैले गरेको सम्झौता कुल्चेर डा। केसीको स्वास्थ्य जोखिममा पर्दै गए दबाबका लागि हदैसम्मको विरोधका कार्यक्रमहरु ल्याउन विवेकशील नेपाली दल बाध्य हुने विज्ञप्तीमार्फत चेतावनी दिइएको छ । केसीकोे ज्यान खतरामा परेको अवस्थामा त्यसले सिर्जना गर्ने असहज अवस्थाका लागि सरकार जिम्मेवार हुने विज्ञप्तीमा भनिएको छ ।
विवेकशील नेपाली दलले डा केसीको सत्याग्रहका लागि शनिबार माईतीघर मण्डलामा नागरिकस्तरबाट आयोजना हुने शान्तिपूर्ण दवाव कार्यक्रममा उपस्थित भइदिन आव्हानसमेत गरेको छ । साथै उसले स्विस बैङ्कमा जम्मा रहेको भनिएको रकमको गहन छानबिन गरी सत्य तथ्य बाहिर ल्याउन सरकारसँग माग गरेको छ । ‘‘विदेशमा लगानी गरेका भनिएका नेपालीहरूका बारे पनि आवश्यक छानबिन गरी कानुन बमोजिम कारबाहीको लागि माग गर्दछौं’’ पौड्यालद्वारा जारी विज्ञप्तीमा उल्लेख छ ।