काठमाडौं । प्रधानमन्त्री केपी शर्मा ओलीले लोकतन्त्रमा अनशन सर्वोपरी नहुने बताएका छन् । संसदमा प्रधानमन्त्री ओलीले चिकित्सा शिक्षा क्षेत्र सुधारको माग राख्दै अनशनरत डा. गोविन्द केसीप्रति इंगित गर्दै लोकतन्त्रमा अनशन सर्वोपरी नहुने बताएका हुन् । ‘‘एक जना अनशन बसेपछि देशै ठप्प हुने, विधि, कानुन, राष्ट्रिय आवश्यकताले कामै नगर्ने अनशन लोकतन्त्रमा सर्वोपरी हुने हुँदैन,’’ उनले भने ।
डा. केसीसँग भएको सम्झौता तत्कालिन परिस्थितिको उपज भएको र परिस्थितिले सिर्जना गरेको उक्त सम्झौताप्रति सरकार प्रतिबद्ध रहेको प्रधानमन्त्रीको भनाइ थियो । सरकारले सम्झौताअनुसार संसदमा ऐन प्रस्तुत गरेको भन्दै उनले सरकारसँग बहुमत भएकै भरमा संसदजस्तो सर्वोच्च निकायको मर्यादा र गरिमालाई थिचोमिचो गर्न नसक्ने बताए ।
प्रधानमन्त्रीले जवाफ दिनुअघि कांग्रेस सांसद गगन थापाले उनलाई संसदीय प्रक्रिया अपनाएर केसीसँग भएको सम्झौता कार्यान्वयनका लागि सरकारको तयारीबारे प्रश्न गरेका थिए । जवाफमा प्रधानमन्त्रीले भने, ‘‘संसदलाई आदेश दिन सक्दिन, आदेश पालना गर्छु । सरकारले गरेको सहमति संसद्ले कार्यान्वयन गरिदेओस भन्ने आग्रह हो ।’’
कानुनभन्दा कोही पनि माथि नहुने जिकिर गर्दै ओलीले विधि निर्माणमा सरकारलाई गुमराहमा पर्न नहुनेमा जोड दिए ।
