काठमाडौं । जापानको कृषि तथा वन मन्त्रालयको २० सदस्यीय प्रतिनिधिमण्डलले नेपालको भ्रमण गर्ने भएको छ । उनीहरुले माघ ८ देखि ११ गतेसम्म नेपालको औपचारिक भ्रमण गर्ने काठमाडौंस्थित जापानी दूतावासले जनाएको छ ।
जापानी प्रतिनिधिमण्डलको नेतृत्व कृषि तथा वन मन्त्रालयको अन्तराष्ट्रिय मामिला हेर्ने उप महानिर्देशक ताकामी नाकाडाले गर्नेछन् । प्रतिनिधिमण्डलमा जापानी विज्ञ र व्यापारी पनि सहभागी हुने दूतावासद्वारा शुक्रबार जारी विज्ञप्तिमा उल्लेख छ ।
“जापानी कृषि तथा वन मन्त्रालयको प्रतिनिधिमण्डलले नेपालका सम्बन्धित मन्त्रालय र व्यापारीहरुसँग भेटवार्ता गर्नुहुनेछ । उहाँहरुले कृषि क्षेत्रको स्थलगत अवलोकन समेत गर्ने कार्यक्रम रहेको छ,” दूतावासले विज्ञप्तिमा भनेको छ । जापानी प्रतिनिधिमण्डल ‘नेपाल–जापान व्यापार साझेदारी तथा नेटवर्क बैठक २०१९’ मा पनि सहभागी हुनेछ । उक्त बैठक माघ १० गते हुनेछ ।
“भ्रमणको मुख्य उदेश्य कृषिजन्य वस्तुको उत्पादकत्व वृद्धि गर्न सम्भावित अनुसन्धान क्षेत्रको पहिचान गर्नु रहेको छ,” जापानले बताएको छ । क्षेत्रीय खाद्य स्रोतको मूल्य, गुणस्तर मापन गर्न पनि भ्रमणले सघाउने जनाइएको छ । कृषि क्षेत्रमा लगानी र व्यापारको वातावरण अभिवृद्धि गर्न समेत भ्रमणको बेला छलफल हुनेछ ।
दूतावासका अनुसार नेपाल आउने जापानी प्रतिनिधिमण्डलले काभ्रेपलाञ्चोक जिल्लामा रहेको कृषि फार्म, दूध उत्पादन, प्रतिक्षा एग्रिकल्चर कोअपरेटिभ लिमिटेड लगायतको अवलोकन गर्नेछ ।