विराटनगर । राजधानीको मागमा केही समय चुप लागेर बसेका धनकुटाबासी फेरि आन्दोलित भएका छन् । नागरिकका तर्फबाट ‘धनकुटालाई प्रदेश १ को राजधानी बनाउने अभियान जारी छ’ भन्ने सन्देशसहित आन्दोलन सुरु गरिएको हो । 
प्रदेश नम्बर १ को राजधानी धनकुटालाई बनाउ अभियानका संयोजक सुन्दरबाबु श्रेष्ठले राजधानी मागको आन्दोलन केही समयको लागि स्थगन गरिएको तर पछि नहटिएको बताउँदै भने,‘‘अब प्रदेश सभाको हिउँदे अधिवेशन सुरु हुन लाग्दैछ । हामीले फेरि आन्दोलनका कार्यक्रम तय गरी निर्णायक रुपमा अघि बढ्ने तयारी गरेका छौं ।’’ अघिल्लो सरकारले गत वर्ष फागुन ३ गते क्षेत्रीय सदरमुकाम धनकुटाको साटो विराटनगरलाई अस्थायी राजधानी तोकेको थियो । त्यही दिनलाई ‘कालोदिन’ मानेर विरोध गर्दै बिहीबारबाट राजधानी आन्दोलनको शंघघोष गरिएको श्रेष्ठले सुनाए । 
धनकुटालाई प्रादेशिक राजधानी बनाऔं अभियानमा सहभागी पत्रकार विजयसन्तोषी राईले आन्दोलन अझ घनीभुत रुपमा अघि बढाइने बताए । भने, ‘‘अब नयाँ ढंगले आन्दोलनलाई अघि बढाउने तयारी गरेका छौं ।’’ उनले आन्दोलनका कार्यक्रम घोषणा गरेरै अघि बढ्ने तयारी गरिएको बताए ।
राजधानी आन्दोलनमा राजनीतिक दल नेपाल कम्युनिष्ट पार्टी, नेपाली काँगेस,  राष्ट्रिय जनमोर्चालगायत दलले पनि साथ दिएका छन् । उद्योगी तथा व्यापारी पनि आन्दोलनमा होमिएका छन् । अघिल्लो वर्ष राजधानी माग्दै तीन महिनासम्म धनकुटाबासीले आन्दोलन गरेका थिए । 
प्रदेश सरकारले माघ २० गतेदेखि हिउँदे अधिवेशन गर्ने निर्णय गरेको छ । मुख्यमन्त्री शेरधन राईले यही अधिवेशनले प्रदेश १ को नाम र राजधानी टुंगो लगाउने बताएका छन् ।