काठमाडौं । बंगलादेश प्रिमियर लिग (बीपीएल) मा नेपाली राष्ट्रिय टोलीका लेग स्पिनर सन्दीप लामिछाने आवद्ध सिलेट सिक्सर आज छैटौं खेलमा ढाका डाइनामाइट्ससँग खेल्दैछ । पाँचौं खेलसम्म दुईमा जित र तीनमा हारको नतिजासहित पुछारबाट दोस्रो स्थानमा रहेको सिलेट छैटौं खेलमा ढाकाविरुद्ध खेल्न लागेको हो । ढाका ८ अंकसहित शिर्षस्थानमा छ । सिलेट अन्तर्राष्ट्रिय क्रिकेट मैदानमा खेल दिउँसो १ ः४५ बजे सुरु हुनेछ ।
यसअघि ढाकाविरुद्ध खेलमा महँगो सावित भएपछि सन्दीपले त्यसपछिको चौथो खेलमा टोलीमा स्थान बनाएका थिएन् । पाँचौं खेलमा पुनरागमन गर्दै एक विकेट लिएका उनी प्लेइङ–११ मा पर्लान् ? कप्तान डेबिड वार्नर घाइते भएपछि समस्यामा रहेको सिक्सरको टोलीमा सन्दीपका प्रदर्शन कस्तो रहला ? पाँचौं खेलमा पुनरागमन गर्दै उत्कृष्ट बलिङसाथ १ विकेट लिएपछि उनको टोली सिलेट सिक्सर्स रंगपुर राइर्डसविरुद्ध २७ रनले विजय भएको थियो । चार ओभर बलिङ गरेका सन्दीपले १८ रन दिएर १ विकेट लिएका थिए ।
कोमिला भिक्टोरियन्सविरूद्धको पहिलो खेलमा २ विकेट लिएका थिए । त्यसपछि दोस्रो खेलमा चितागोङ भिकिन्सविरुद्ध कसिलो बलिङ गर्दै कम खर्चन सफल भए पनि सन्दीप विकेटविहीन रहे । उनले ४ ओभर बलिङ गर्दै २० रन खर्चेका थिए । तेस्रो खेलमा ढाका डाइनामाइट्ससँग ४ ओभर बलिङ गरेका उनले ३३ रन खर्चिएका थिए । लगातार दुई खेलमा विकेट लिन नसकेपछि सन्दीपलाई कोमिला भिक्टोरियनविरूद्धकै खेलमा टोलीमा राखिएको थिएन ।