काठमाडौं । अख्तियार दुरुपयोग अनुसन्धान आयोगले भ्रष्टाचार गरेको आरोपमा बर्दियाको राजापुर नगरपालिका वडा नं. १० का वडा सदस्य उत्तम चौधरीमाथि विशेष अदालत काठमाडौंमा मुद्दा दर्ता गरेको छ । चौधरीसँग २ लाख ५० हजार रुपैयाँ बिगो दाबी समेत गरिएको छ ।
“वडा सदस्य उक्तम चौधरीले भ्रष्टाचार निवारण ऐन, २०५९ को दफा ३ को उदफा (१) बमोजिम कसुर गरेको पुष्टि हुन आएकोले निजलाई बिगो २ लाख ५० हजार रुपैयाँ कायम गरी भ्रष्टाचार निवारण ऐन, २०५९ को दफा ३ को उपदफा (१) को देहाय (घ) बमोजिम जरिवाना र कैद सजाय हुन मागदाबी लिई आज (बिहीबार) विशेष अदालत काठमाडौंमा आरोपपत्र दायर गरिएको छ,” अख्तियारद्वारा बिहीबार जारी विज्ञप्तिमा उल्लेख छ ।
वडा सदस्य चौधरीले क्रसर उद्योगको दर्ता गर्न सिफारिस तथा सहयोग गरिदिने भनी सेवाग्राहीसँग घुस लिने गरेको उजुरी अख्तियारमा परेको थियो । त्यसपछि बुटवल र नेपालगञ्ज स्थित अख्तियारको कार्यालयबाट गएको एक टोलीले केही दिनअघि उनलाई घुस लिइसकेको अवस्थामा पक्राउ गरेको थियो । चौधरी माथि थप अनुसन्धान गरी अख्तियारले बिहीबार मुद्दा दायर गरेको हो ।