काठमाडौं । वैदेशिक रोजगारीका लागि नेपालबाट श्रमिकहरु जापान लैजानेबारे नेपाली र जापानी प्रतिनिधिमण्डलबीच औपचारिक छलफल भएको छ । व्यवस्थित, सुरक्षित र मर्यादित रुपमा नेपाली श्रमिक जापानमा पठाउने सन्दर्भमा पारस्परिक हित प्रवद्र्धन हुनेगरी समझदारी कायम गर्न श्रमिक आप्रवासनका विविध आयाममा छलफल भएको श्रम, रोजगार तथा सामाजिक सुरक्षा मन्त्रालयले बताएको छ ।
नेपालले पारदर्शी र प्रतिष्पर्धाबाट उपयुक्त विधि, प्रणाली र संयन्त्रको विकास गरी आप्रवासनका क्षेत्रमा विश्वव्यापी रुपमा स्थापित भएका नविनतम मान्यता एवम् मापदण्डअनुरुप श्रमिक पठाउने विषयमा जोड दिएको छ ।
बैठकमा आगामी दिनमा द्विपक्षीय सम्वाद कायम गर्दै उच्चस्तरको समझदारी गरी छिट्टै नेपाली श्रमिकले नयाँ व्यवस्थाअनुरुप जापानमा काम गर्न पाउने वातावरणको सिर्जना गर्न दुवै मुलुकले थप गृहकार्य गर्ने सहमति भएको छ ।
त्यसैगरी नेपाली कामदारले जापानमा सिकेको ज्ञान, सीप र अनुभवलाई उद्यमशिलताको माध्यम मार्फत नेपालको विकासमा योगदान पुर्याउने वातावरणको सृजना गर्ने गरी दुबै देशले सहकार्य गर्दै जाने सहमति भएको छ ।