काठमाडौं । नयाँ शक्ति पार्टी नेपालका संयोजक एवम् पूर्व प्रधानमन्त्री डा. बाबुराम भट्टराईले सत्तारूढ नेपाल कम्युनिस्ट पार्टी (नेकपा) र प्रमुख प्रतिपक्षी नेपाली कांग्रेस दुवै भ्रष्टाचारको ‘ब्राण्ड भएको जिकिर गरेका छन् ।
बिहीबार काठमाडौंमा वाइड बडी प्रकरणबारे पार्टीको धारणा सार्वजनिक गर्दै उनले भ्रष्टाचारको मामलामा कांग्रेस एमाले ‘कोकाकोला र पेप्सीजस्तै उस्तै ब्रान्ड भएको गएगुजिएको पेय पर्दार्थ बेचिरहेको जिकिर गरेका छन् ।
“हिजो त्यत्रो बलिदान गरेर आएका कांग्रेस र कम्युनिस्ट ब्रान्डका कोकाकोला र पेप्सीजस्ता अत्यन्त लोकप्रिय रहेका र गएगुज्रिएका पेय पदार्थजस्ता पार्टीहरू सत्तामा छन् । मिलेमतो गरेर भ्रष्टाचार गरेको प्रष्टै छ,” उनले अन्तरक्रिया कार्यक्रममा भने ।
त्यस्तै उनले संसदीय समितिले उपसमितिको प्रतिवेदन अदलबदल गरेको प्रकाश पार्दै ती समितिबाट यसको टुंगो नलाग्ने जिकिर गरे । त्यस्तै उनले सरकारले बनाएको न्यायिक जाँचबुझ समितिले पनि किनारा लगाउन नसक्ने बताउँदै सबै दलका सांसद सम्मिलित उच्चस्तरीय संसदीय समिति बनाउन माग गरेका छन् ।
“यो धेरै गम्भीर प्रकृतिको भ्रष्टाचार छ । यो भइराख्छ भनेर त्यत्तिकै सहेर बस्ने कि, चिनियाँ कथामा उल्लेखित पहाड पन्छाउने मूर्ख बूढोझैँ कुनै न कुनै दिन यो पहाड फाल्न सक्छौँ भनेर खन्न थाल्ने ? हामीले खनेपछि यो भ्रष्टाचारको पहाड पन्छाउन सकिन्छ भनेर खन्न थाल्ने ?,” उनले प्रश्न गरे ।
उनले वाइड बडी प्रकरणमा एक्लै भए पनि लड्ने प्रतिवद्धता दोहोर्याए । त्यस्तै उनले वाइडबडी प्रकरणमा प्रमुख प्रतिपक्षी दलका नेता शेरबहादुर देउवाको समेत नाम जोडिएपछि बचाउन सत्तापक्षकै नेता लागिपरेको खुलासा गरे ।
“अस्तिको दिन मलाई शंका त लागेको थियो, सार्वजनिक लेखा समितिको प्रदिवेदनमा जुन बिबाद देखा प¥यो, त्यसपछि प्रमुख प्रतिपक्ष र सत्तापक्षको बालुवाटारमा बैठक बस्यो, त्यो मैले सुनेँ । प्रमुख प्रतिपक्ष र सत्तापक्ष बीच सम्वाद हुनु त राम्रो कुरा हो भन्ठान्दै थिएँ, गुपचुप पो रहेछ ! मेरा पुराना मित्र प्रचण्डलाई त म राम्रोसँग चिन्छु, उहाँ फुर्किएपछि त कुरा खोलिहाल्नुहुन्छ । भोलिपल्टै चितवनमा गएर भन्नुभयो– राष्ट्रियसहमति भयो । अब राष्ट्रिय सहमति बमोजिम गरिन्छ । मलाई चिसो पस्यो– कतै वाइड बडीमा त राष्ट्रिय सहमति भएन ? नभन्दै दुईदिनपछि पत्रपत्रिमा देउवा मुछिएको समाचार आइहाल्यो,” उनको खुलासा थियो । अतः उनले पुराना दलको क्रान्तिप्रतिको योगदानलाई अवमूल्यन नगरिने तर सधैँ क्रान्तिको ब्याज नखान ध्यानकर्षणसमेत गराए ।