काठमाडौं । चार वर्ष बितिसक्दा पनि काठमाडौंमा चारवटा आर्कब्रिजको निर्माण सम्पन्न भएको छैन । चार वर्षमा निर्माण सम्पन्न गर्नेगरी ०७१ मा ठेक्का लगाइएको बागमती र धोबिखोलाको आर्कब्रिज निर्माण हालसम्म सकिएको छैन
।
सडक विभागले पप्पु कन्ट्रक्सनलाई २०७५ असारमा सम्पन्न गर्ने गरी बागमती नदीमा आर्कब्रिज निर्माणको ठेक्का लगाएको थियो भने जेई कन्स्ट्रक्सनलाई २०७४ पुसमा सम्पन्न गर्ने गरी धोबीखोलामा आर्कब्रिज निर्माणको ठेक्का लगाइएको थियो । २०७१ पुसबाट काम सुरु भएको दुई स्थानका ४ वटा आर्कब्रिज निर्माण २०७२ वैशाखको भूकम्प र लगत्तैको नाकाबन्दीका कारण प्रभावित बनेको उपत्यका सडक विस्तार आयोजनाका प्रवक्ता विश्वविजयलाल श्रेष्ठले बताए ।

चारवटै आर्कब्रिजमा एकसाथ काम सुरु भए पनि बागमतीका दुईवटा आर्कब्रिजमा हाल फउन्डेसनको काम सकिएको प्रवक्ता श्रेष्ठले बताए । हाल धोबिखोला दक्षिणतर्फको आर्कब्रिज अन्तिम चरणमा पुगेको आयोजनाको भनाइ छ ।

“धोबिखोलाको उक्त आर्कब्रिजको एप्रोच रोडमा ब्ल्याकटप गर्न बाँकी छ,” प्रवक्ता श्रेष्ठले बाह्रखरीसँग भने, “मेलम्ची खानेपानी आयोजनाले पाइप बिछ्याउन हालै त्यहाँ खनेकाले एप्रोच रोड फिनिसिङको काम थपिएको छ ।” धोबिखोलाको दक्षिणतर्फको उक्त आर्कब्रिजको नेटवर्क तार तन्काउने काम सकिएको र फिनिसिङको काम चाँडै हुने प्रवक्ता श्रेष्ठले बताए । “यसपछि ब्रिजमा कालोपत्रेको काम फागुनपछि मात्र सुरु गरिनेछ,” श्रेष्ठले भने । 

धोबिखोला र बाग्मतीमा बाँकी आर्कब्रिजको कामको प्रगति निराशाजनक देखिएको छ ।  पप्पु कन्स्ट्रक्सनले जिम्मा पाएका अधिकांश आयोजना गुणस्तरीय नहुने र समयमै काम सम्पन्न नगर्ने गुनासो पनि उत्तिकै छ । 

पप्पुले नै हाल निर्माण गरिरहेको उक्त आर्कब्रिज निर्माण सम्पन्न हुने मितिबारे अहिले केही भन्न नसकिने प्रवक्ता श्रेष्ठले बताए । “तीनकुनेस्थित उक्त आर्कब्रिजको पायलिङ र फर्मा अड्याउनका लागि स्टेजिङ र फाउन्डेसनको काम सकिएको छ,” श्रेष्ठले भने, “माघे सङ्क्रन्ति मनाउन कामदारहरु बिदामा रहेकाले चारै स्थानका आर्कब्रिज निर्माण हाल सुस्ताएको हो ।”

भूकम्प र नाकाबन्दीका कारण निर्माण सामग्री अभाव भएका कारण आर्कब्रिज निर्माणमा ढिलाइ हुँदै आएको आयोजनाको दाबी छ ।  तर नर्माण सम्पन्न हुने मिति गुज्रिसक्दा पनि चार स्थानमध्ये एउटा पनि आर्कब्रिजको निर्माण सम्पन्न भएको छैन । केन्द्रीय राजधानीका व्यस्त सडकमा निर्माणधीन यी आर्कब्रिजको निर्माणबारे सडक विभागले आवश्यक निरीक्षण गरेको छैन ।

धोबीखोलाको दक्षिणतर्फ करिब सम्पन्न भएको आर्कब्रिजको लम्बाइ ५० मिटर रहेको छ भने बाग्मती नदीमा ८५ मिटर लम्बाइमा आर्कब्रिज बन्ने छ । धोबीखोलाको आर्कब्रिज निर्माणको लागत १३ करोड अनुमान गरिएको छ भने बाग्मती नदीको आर्कब्रिजको लागत २१ करोड अनुमान गरिएको छ ।

आयोजनाका अनुसार हालसम्म धोबीखोलाको आर्कब्रिजको भौतिक प्रगति ७० प्रतिशत र बागमती नदीको आर्कब्रिजको भौतिक प्रगति ४० प्रतिशत देखिएको छ ।