काठमाडौं । यातायात व्यवस्था विभागले ल्याउने भनेको मास प्रिन्टर आइनपुग्दा स्मार्ट लाइसेन्स प्रिन्टमा ढिलाइ भएको छ । विभागले १ महिनाअघि नै टेन्डर आह्वान गरे पनि हालसम्म मास प्रिन्टर आइपुगेको छैन । विभागले हाल ७ वटा प्रिन्टरले स्मार्ट लाइसेन्स प्रिन्ट गरिरहेको विभागका निर्देशक तथा सुचना अधिकारी गोकर्णप्रसाद उपाध्यायले बताए ।
मास प्रिन्टरका लागि बोलपत्र आह्वान गरिएकोमा भारतका २ र फ्रान्सको एक कम्पनी इच्छुक देखिएको उपाध्ययले जानकारी दिए ।
“भारतका २ र फ्रान्सको एक कम्पनी मास प्रिन्टर उपलब्ध गराउन इच्छुक देखिएका छन्,” उपाध्ययले बाह्रखरीसँग भने, “यसका लागि हामी खरिद प्रक्रियामा छौं । मास प्रिन्टर कहिले आइपुग्छ भन्ने यकिन छैन ।”
हाल स्मार्ट लाइसेन्सको दैनिक माग १० हजार रहेको छ । जसमा विभागले दैनिक ३ हजार लाइसेन्स प्रिन्ट गर्दै आएको छ । विभागसँग रहेका ७ वटा प्रिन्टरले दैनिक यी संख्याका लाइसेन्स प्रिन्ट गर्दै आएको हो । मङ्सिर अन्तिम साताबाट यातायात व्यवस्था कार्यालयहरु प्रदेश सरकार मातहत गए पनि स्मार्ट लाइसेन्स सहज हुन सकेको छैन ।
प्रशासनिक काम प्रदेश मातहतका यातायात व्यवस्था कार्यालयहरुले गरे पनि स्मार्ट लाइसेन्स प्रिन्ट गरेका छैनन् । आवश्यक प्रिन्टर र जनशक्ति नहुँदा प्रदेश मातहतका कार्यालयहरुले स्मार्ट लाइसेन्स प्रिन्ट गर्न नसकेका हुन् । हाल काठमाडौंस्थित विभागले दैनिक प्रिन्ट गर्ने उक्त संख्यका स्मार्ट लाइसेन्स हुलाकमार्फत प्रदेशस्थित यातायात व्यवस्था कार्यालयमा पठाउँदै आएको छ ।
स्मार्ट लाइसेन्सलाई विभागले सहज बनाउन नसक्दा नक्कली स्मार्ट लाइसेन्स प्रिन्टको कारोबारसमेत गरिने भेटिएको छ । “हामीले चेकजाँचका क्रममा हालसम्म ५ थान नक्कली स्मार्ट लाइसेन्स फेला पारेका छौं,” महानगरीय ट्राफिक प्रहरी महाशाखाका प्रमुख, एसएसपी बसन्तकुमार पन्तले भने ।
यस्तै स्मार्ट लाइसेन्स चेकजाँच गर्ने उपकरण ट्राफिक प्रहरीसँग नहुँदा अन्दाजका भरमा चेकजाँज गरिरहनु परेको ट्राफिक प्रहरीहरु बताउँछन् ।
“मास प्रिन्टर आएपछि दैनिक मागअनुसार स्मार्ट लाइसेन्स प्रिन्ट हुनेछ,” निर्देशक उपाध्ययले भने, “मागअनुसार प्रिन्ट भएपछि हालको समस्या समाधान हुनेछ, साथै स्मार्ट लाइसेन्स चेकजाँचका लागि ट्राफिक प्रहरीलाई डिभाइस पनि उपलब्ध गराइने छ ।”
मास प्रिन्टरले प्रतिघण्टा ३ देखि ५ हजार स्मार्ट लाइसेन्स प्रिन्ट गर्ने विभागको दाबी छ ।
