एजेन्सी । राफेल नाडालले लामो समयदेखि कोर्टमा प्रतिद्वन्द्विता रहँदै आएका एण्डी मरेले संन्यास लिन गरेको निर्णय सही भएको बताएका छन् । चोटबाट लगातार सताइएका कारण ३१ वर्षे बेलायती स्टार मरेले शुक्रबार यो वर्ष टेनिसबाट सन्यास लिने बताएका थिए । उनले सोमबार मेलबर्नमा सुरु हुने अस्ट्रेलियन ओपन आफ्ना लागि अन्तिम प्रतियोगिता हुन सक्ने बताएका थिए । 
‘चोटका कारण राम्ररी मुभमेन्ट गर्न नसक्ने अवस्थामा विना कुनै लक्ष्य कोर्टमा जानु भनेको अत्यन्तै पीडादायक कुरा हो । यस्तो बेला विदा हुने निर्णय लिनु सही हुन्छ,’ नाडालले भने, ‘उनको संन्यासले विश्व टेनिसमा एउटा ठूलो रिक्तता सिर्जना गर्नेछ । कोर्टमा उनलाई सबै खेलाडी र समर्थकले धेरै मिस गर्नेछन् ।’
३२ वर्षे नाडालको करियरमा पनि चोटले धेरै अवरोध हालेको थियो । तर १७ पटकका ग्राण्ड स्लाम च्याम्पियनले आफूलाई ‘टेनिस नै छोड्नुपर्छ,’ भन्ने अवस्था महशुस नभएको बताए । ‘हरेक पटक घाइते हुँदा मलाई चाँडै ठिक हुन्छु भन्ने लाग्थ्यो,’ विश्व वरियताक्रमको दोस्रो नम्बरमा रहेका नाडालले भने, ‘तर लामो समयसम्म पनि सुधार देखिएन र चोटले सताइरह्यो भने त्यो अन्तयन्तै पीडायादी हुन्छ । मरेलाई अहिले मानसिक रुपमा कति पीडा भइरहेको छ भन्ने म राम्ररी अनुमान लगाउन सक्छु ।’