काठमाडौं । परराष्ट्रमन्त्री प्रदीप ज्ञवालीले मतभिन्नताहरु संवादको माध्यमबाट समाधान गर्नुपर्ने बताउँदै दक्षिण एशियाली क्षेत्रीय सहयोग संगठन (सार्क) को शिखर सम्मेलन हुनुपर्ने कुरामा जोड दिएका छन् ।
भारत भ्रमणमा रहेका मन्त्री ज्ञवालीले शुक्रबार नयाँ दिल्लीमा पत्रकारहरुसँग कुरा गर्दै सो कुरा बताएको टाइम्स अफ इण्डियाको अनलाइन संस्करणले शुक्रबार जनाएको छ । उनले यो क्षेत्रको आतंकवाद लगायतका अन्य चुनौतिहरु सामना गर्न एकीकृत ढंगले अघि बढ्नुपर्ने जनाएका छन् । ज्ञवालीले गएको वर्ष सिंगापुरमा अमेरिकाका राष्ट्रपति डोनाल्ड ट्रम्प र उत्तर कोरियाका नेता किम जोङ उनबीच भएको वार्ताको प्रसंग उल्लेख गर्दै संवाद नै मतभेद अन्त्य गर्ने महत्वपूर्ण बाटो भएको बताएका थिए । ‘‘ट्रम्प र किम भेट्न सक्नुहुन्छ भने अन्य देशका नेताहरु किन भेट्न नसक्ने ?’’ ज्ञवालीले सो अवसरमा भनेका थिए । सार्कको आगामी शिखर सम्मेलनको पालो पाकिस्तानको भएपनि उसले सीमापार आतंकवादलाई प्रश्रय दिएको भन्दै भारतले शिखर सम्मेलनमा उपस्थितिको लागि अस्वीकार गर्दै आएको छ ।
सँगै बसेर मतभेद अन्त्य गर्नुको विकल्प नरहेको बताउँदै ज्ञवालीले यो क्षेत्रका समश्या समाधान गर्न एक्लैले नसक्ने समेत सो अवसरमा बताएका थिए । उनले नेपालले सार्कको बारेमा समेत भारतसँग कुरा गरिरहेको उल्लेख गर्दै शिखर सम्मेलन चाँडै हुने कुरामा आफू आशावादी रहेको जनाए । उनले आफूले भारतसँग नेपालमा रहेको करिब ७ करोड भारु पुराना नोट सटहीका बारेमा पनि भारतसँग कुरा गरेको बताए । उनले विहीबारमात्रै आफ्ना भारतीय समकक्षी सुष्मा स्वराजसँग भेटवार्ता गरेका थिए ।
ज्ञवालीले सो अवसरमा नेपालको भारत र चीन दुवैसँग राम्रो सम्बन्ध रहेको जनाउँदै त्यो सम्वन्ध एक अर्कामा तुलना हुन नसक्ने समेत बताएका थिए ।